احنا اسفين يا كورونا، كان هذا تعليق طفلان على مقطع فيديو كوميدى نشراه عبر صفحة أحدهما على "فيس بوك"، ويروى الشقيقان سيف ويوسف الديب، البالغ عمرهما 13 عامًا، من خلال الفيديو، معاناة جيلهما فى الحياة على هذا الكوكب، والذى لم ينعم بطفولة هادئة مثل باقى الأجيال التى سبقته، ويسرد الشقيقان مأساة جيل الألفينات بطريقة كوميدية بعد معايشتهم ثورتين وتفشى وباء عالمى هو فيروس كورونا المستجد "كوفيد 19".
وبدأ الشقيقان يوسف وسيف، مقطع الفيديو، بقولهما، "يا جماعة أنا عايز احكيلكو حكاية.. أنا عارف طبعا إنها مش هتبقى وقتها دلوقتى عشان عارف موضوع كورونا.. بس أنا الموضوع مبقاش يتسكت عليه خالص.. يا جماعة أنا مواليد 2007 يعنى واحد عنده 13 سنة.. طبعًا أنتوا فاكرين الموضوع عادى 2007 عادى.. لا دى قصة مرعبة بمعنى الكلمة".
وأضاف الطفلان "أنا بقى إيه.. قعدنا أول 3 سنين أهالينا بيلبسونا البامبرز وعمالين بيغيرولنا ويحطولنا مرهم تسلخات ويرضعونى عشان بعيط وبيدونا التيتينا زى أى طفل عادى هيعيش حياته.. يادوب قلعنا البامبرز وقولنا هنهدك يا دنيا عملولنا ثورة وقعدونا فى البيت.. بعدها بـ3 سنين ولا حاجة عملولنا ثورة تانية وعملولنا حظر تجول وقعدونا فى البيت".
وتابع الشقيقان "بعدها فى 2020 جاى بيقولولى الحق ياعم فيروس كورونا بيجرى ورا الناس فى الشارع وقعدونا فى البيت.. عايزين نعيش حياتنا.. يا جماعة احنا عدينا مرحلة التوحد.. سنين عمرنا راحت فى الحظر ارحمونا.. دا أنا بقيت بكلم الحيطة.. ما هى مش كلها ثورات قللولنا الثورات شوية.. والله عايزين نعيش حياتنا.. احنا لسه أطفال والله احنا لسه أطفال..
واستطرد يوسف وسيف، "يا جماعة بابا وماما بيحكولى وكان بيقولولى حاجات لا يمكن تتخيلو جميلة وكانوا بيخرجوا مع أصحابهم.. أنا أقول لولادى إيه؟!.. أنا كنت قاعد فى البيت.. أنا مش عارف إيه اللى بيحصل فى الدنيا.. أنا أبويا كان بيحكيلى عن صفاء أبو السعود لما تيجى تطلع تغنى.. وبيتفرج على كرومبو وكده.. دا أنا وأنا عندى 4 سنين كنت واقف فى لجان شعبية تحت".
وأضافا "يا جماعة دا أنا كنت بتفرج على أستاذ تامر أمين.. دول بيقولولنا عشان السلاحف البحرية.. احنا بشر أقسم بالله عاملونا معاملة السلاحف البحرية معندناش أى مشكلة بس عايزين نعيش حياتنا.. أنا بوجه رسالة لسيادة الرئيس.. احنا كجيل 2006 و2007 و2008 و2009.. احنا جيل ينفع تجيبلنا ديزنى لاند.. تجيبلنا كارنية نروح ناكل براحتنا وببلاش وكل حاجة.. تدينا فلوس تدخلنا فى بطاقة التموين أى حاجة بس فرفشونا.. يا إما يعملولنا معاش مبكر.. يا إما يطلعولنا بطاقة تعمير".
وعن أفضل شىء حدث لهما فى حياتهما، قال الطفلان فى نهاية الفيديو: "اعملولنا أى حاجة بس عايزين نعيش حياتنا.. نقول اللى لينا واللى علينا.. الحاجة العدلة اللى عملوهالنا منعونا من المدارس 6 شهور.. صقفة للوزير والله.. يا جماعة انتوا متخيلين جيل حضر ثورتين وفيروس كورونا.. انتوا متخيلين الجيل ده هيعمل فيكوا إيه لما يكبر؟!.. اللهم بلغت اللهم فاشهد.. على العموم شكرًا يا كوكب على كل اللى عملتوه معانا".
تم أضافة تعليقك سوف يظهر بعد المراجعة