خالد صلاح

برعاية سوبر كورة

سوبر كورة

مروى عادل تكتب: لونك إيه؟

الثلاثاء، 17 يوليه 2018 08:00 ص
مروى عادل تكتب: لونك إيه؟ أسرة – صورة أرشيفية

مشاركة

اضف تعليقاً واقرأ تعليقات القراء

عمرك فكرت لونك إيه؟

الحياة علبة ألوان وزى ما كل واحد فينا له فيها دور كمان له فيها لون..

وفى منا كتير ميكسات أخدين من كل الألوان حتى مشاعرنا ألوان ..

الأبيض نانا بطرحتها البيضا وقلبها الأبيض حضن بيطمن، بيت العيلة وصوت أبويا وهو بيؤمنا فى الصلاة، طعم كوباية اللبن الصُبح وطعم الرز على الغدا، صوت العياط لما تلاقى بعديه طبطبة، الأبيض ثقة وروح مطمنة وفرحة طايرة فى السما..

والأورنچ دفا حتحسه والشمس طالعة وساعات نقط مية على جبينك فى عز الحر، طعم البرتقان والسفاندى فى عز البرد، الحب والكلمة الحلوة والضحكة اللى بتخلى عينيك تكرمش من الهنا..

أما الأصفر.. حيرة ساعات فرحة وساعات غيرة ..الأصفر ضحكةٌ صفرا وفرحة مش مطمنة، سفر ووحدة وسط ناس كتير، يأس فى عز الأمل، طعم المانجة اللى بتحتار فيها إذا كانت مالحة ولا حلوة!

الأسود.. ضلمة وخوف وساعات حُزن وبكا، لو ليك حبيبة حتلاقى الأسود فى حزنها كُحل سايح مليان دُموع، الأسود طعم المُر فى القهوة وريحة الفلفل لما تعطس.. الأسود مش لون الأسود ليل ما بيخلصش لحد ما تسمح صوت الأدان ..

والأخضر ..ملمس النجيلة وأنت حافى، طبق الملوخية السخن وأنت بتاكلها بالمعلقة أو وأنت بتعمل العيش ودن قطة، الأخضر قبة مسجد النبى..

الأحمر.. إيدك لما بتنجرح، نار بتلسع وبتحرق، الأحمر غضب وخطر، طعم الرُمان المذذ وطعم البلح لما ينشف ويموت من العطش ..

الأزرق بقى براح.. صوت البحر وأنت سارح فى السما، سلام وقلب بيفضفض كلام، قوة وكتف سند، الأزرق خيال، حلمى لونه أزرق شباك مفتوح عالسما..

حلملك لونه إيه؟

أخضر بلون الشجر ولا أحمر زى الورد؟

أصفر زى لون الشمس وهى بتعافر تقوم ولا أورانج زى لون الغروب؟

ولا أبيض زى السحاب؟ حلمك بأنهى لون؟

الحلم شباك مفتوح على بكرة ..

أوعى تقفل الشباك ..

 أوعى تكون بطلت تحلم!


مشاركة

اضف تعليقاً واقرأ تعليقات القراء

لا توجد تعليقات على الخبر
اضف تعليق

تم أضافة تعليقك سوف يظهر بعد المراجعة





لا تفوتك
الرجوع الى أعلى الصفحة