حالة من الجدل الشديد والاستياء، سادت مواقع التواصل الاجتماعي على اختلافها، وعلى رأسها فيسبوك، بعد انتشار صورة لمشجع من مشجعى النادي الأهلى، يرفع لافتة في حضوره لأحد ماتشات المارد الأحمر، وكتب عليها " مراتي بتولد بس الأهلى أهم".
الصورة التى استهدف به الشخص، كسب الاهتمام ولفت الأنظار، بسبب حبه الشديد للقلعة الحمراء، انقلبت عليه، وتحولت لسبب هام للهجوم عليه، وأثارت حالة من الجدل والاستياء الشديدين، اليومين الماضيين.
واعتبر رواد مواقع التواصل، الصورة بأنها عار على صاحبها، مستنكرين أنه ترك زوجته في موقف "الولادة" ليرفع مثل تلك اللافتة، التي وصفوها بأنها مستفزة، متساءلين عن موقف نجله منه بعد أن يكبر ويرى تلك الصورة.
وقال أحدهم :" أنا مش متصور إن الشخص ده ده ساب مراته بتولد وراح عمل اليافطة العار دي عند خطاط ولا قعد يكتبها وراح الاستاد ومراته بتولد"، وآخر قال :" ابنه حيسيبه وهو بيدفن عشان الأهلى أهم، ما هو مكنش موجود لحظة ولادته ،داين تدان".
فيما علق آخرون :" المشكلة مش أنه سابها فى اللحظة دى المشكلة أنه بيتباهى بعدم مسؤوليته عن زوجته، كارثة بكل المقاييس"، وآخر قال :" أنا الحمد لله دخلت أوضة العمليات مع مراتي و فضلت ماسك ايدها و صورت ابني و بنتي و كبرت في ودنهم أول ما طلعوا و كل فترة اتفرج على فيديو و افتكر أجمل يوم في حياتي، أنا مش متخيل إن في بني آدم ممكن يفوت يوم زى ده عشان ماتش كورة، دول مش أشباه رجال دول حيوانات".
على الجانب الآخر، وضع بعض مرتادي فيس بوك، احتمالية بأن تكون الصورة ملفقة، وليست حقيقية، أو أن يكون الشخص غير متزوج بالأساس، وكتب اللافتة على سبيل السخرية والمزاح.
تم أضافة تعليقك سوف يظهر بعد المراجعة