سألونى فين النوم من عنيك؟
كتب على جفونك
حلم طاير
قلت يا ناس أنا الصبح مسافر
حتى تذكرة السفر
على ضهرها مكتوب
مغادر
أول محطة
خيوط الشمس كانت فى انتظارك
كانت الشمس طله علينا
خيوطها كانت ضفاير
كانت زى عود الفل
فى أول بشاير
طال الانتظار
صوت البلابل
كان بيعزينى فى غيابك
أنا لسه فاكر
كان خوفى عليك
بدل طعم الحلو والسكاكر
مش عارف ليه المر
ملا الدنيا وأنا فى انتظارك
كان قناطير يملا هناجر
أنا لسه فاكر
ومحطة ورا محطة
بتلوح ايادى
أما أنا
نسيت المكتوب فى شهادة ميلادى
بدلته المحطات بصابر
كان وضوئى من ندى الشجر
كأنى فى محرابك بأحلم
والحلم طال كنت فيه
بذاكر
انا لسه فاكر
كنت بأحلم والحلم طال
وأنت تحت الجفون
ودموعى بقت صخرة من أعالى
الجبال
بين أسنان الزمن
كسارة المحاجر
وأصوات كتير بتنادى
خليك وبلاش تهاجر
أنا لسه فاكر
أنا أبدا ما نسيت خمرية الصبح بدرى
بتعزف غنوة فوق المزاهر
بتحكى حكاية قلب
نظراتها لروحى كانت مباخر
حاضنة خيوط الشمس
بجدايل الضفاير
اسأليه هو لسه فاكر؟
مكتوب على تذكرة السفر
دق جرس الوصول
والشعر الأبيض
بين طياته حلم عنوانه
أنا فى انتظارك
وأنا لسه فاكر
***
تم أضافة تعليقك سوف يظهر بعد المراجعة