فيسبوك
واتساب
كانت ملك فى مدرستها تُنصت لمعلمة مادة الرياضيات بحرص، وتتبع كل خطوة تذكرها المعلمة حتى تفهم حل المسألة جيدًا، وتضمن حصولها على الدرجة النهائية فى امتحان الغد. وبعد انتهاء الحصة، سمعت زميلتها ريم، الجالسة بالمقعد المجاور لها، تبكي. فسألتها ملك قائلة: «مالك يا ريم.. بتبكى ليه؟ حد مزعلك؟». فحاولت ريم إخفاء دموعها قائلة: «مفيش حاجة.. مش ببكي».
إيد واحدة لمساندة والد ريم
فردت عليها ملك، حريصة على أن تبوح بما بداخلها لتطمئن عليها، قائلة: «لأ.. بتبكى يا ريم، قوليلى مالك، مش إحنا صحاب ولازم تقوليلى على اللى جواكى»،
فأجابت ريم: «سمعت بابا إمبارح بيشتكى لماما من مصاريف المدرسة، وبيقولها مش عارف هيدفع القسط الأخير إزاي، وكمان كلها كام يوم والعيد يدخل علينا، هيجيب فلوس الملابس منين».
شعرت ملك بالأسى على حال ريم، وحاولت مواساتها قائلة: «ما تزعليش نفسك يا ريم، إن شاء الله هتتحل.. ما تقلقيش».
ابطال الهمم
وفى اليوم نفسه، اجتمعت ملك مع دكتور عقل وأصدقائها الثلاثة: نغم وحكيم ونور، وروت لهم قصة ريم وحالة والدها، وبدأوا يفكرون فى حل يساعدها على الاستمرار فى التعليم، وفى الوقت نفسه يخفف العبء عن والدها. وأوضحت لهم أن سبب حال والدها أنه طُرد من عمله مؤخرًا ظلمًا من صاحب العمل، وهو الآن يبحث عن عمل آخر ليتمكن من تلبية احتياجات أسرته.
فكر دكتور عقل قليلًا، ثم قال للأطفال: «وجدت الحل».
وأكمل قائلًا: «واحد صاحبى فاتح شركة وبيَدور على محاسب شاطر، ممكن أعرض عليه يشغل والد ريم. ومن ناحية تانية نحاول إحنا كمان نجمع فلوس لريم تدفع بيهم قسط المدرسة.. بس إزاى؟».
شخصيات ابطال الهمم .. مغامرات دكتور عقل والخارقون الأربعة
قال نور: «ممكن نعلن فى المساجد والكنائس عن حملة تبرعات ونشرح حالة ريم، وأكيد هنلاقى كذا حد هيتبرع».
سعد دكتور عقل باقتراح نور، وقال له: «أنت صح.. فكرة حلوة جدًا».
وبالفعل، نجح دكتور عقل والأطفال الأربعة فى جمع التبرعات من المساجد والكنائس المجاورة لحارتهم. وعندما تمكنوا من جمع المبلغ المطلوب، بدأوا يفكرون فى الطريقة المناسبة لإعطاء النقود لريم بشكل لائق لا يُشعرها بالحرج.. يتبع
