تيبو.. السر المدفون تحت الرمال

منصور وكرم .. السر الدفون تحت الرمال

نيبو في أرض الفراعنة، برنامج يومي من تأليف أحمد منصور ــ فكرة ورسومات أحمد خلف، تدور كل حلقة حول معلم من معالم مصر الفرعونية، وهذه الحلقة عن مركب الملك خوفو:

منصور وكرم يسيران فى الطريق المؤدى إلى مركب الملك خوفو.
كرم:

هو إحنا كل ما نمشى خطوة نكتشف سر جديد؟
منصور يبتسم:
هو إنت لسه شفت حاجة.
كرم:
تمام
منصور ينظر أمامه:
بص هناك يا كرم.
كرم بدهشة:
إيه الهيكل الخشبى الضخم ده؟
منصور:
ده واحد من أعظم اكتشافات القرن العشرين.
مركب… لكن مش مجرد مركب عادى.
دى مركب الملك خوفو الأولى، أو «مركب الشمس».
تُعد من أقدم وأكبر الآثار العضوية المعروفة فى تاريخ البشرية.
يبلغ أقصى طول لها من حافة المقدمة إلى حافة المؤخرة نحو 42.32 متر، ولها عشرة مجاديف، خمسة على كل جانب، تتراوح أطوالها بين 6.5 و8.5 أمتار.
وتضم مقصورة رئيسية تتقدمها مقصورة الربان فى المقدمة،
أما الدفة، فهى عبارة عن مجدافين كبيرين، ويصل وزن المركب إلى نحو 45 طنا.
كرم:
ياااه… دى عملاقة!
منصور:
وتخيل كمان إنها كانت مدفونة بجوار هرم الملك خوفو الأكبر
فى أهرامات الجيزة
لأكثر من 5000 سنة.
كرم:
طيب إزاى تم العثور عليها؟
منصور:
اكتشفها المهندس كمال الملاخ سنة 1954،
أثناء إزالة الرمال.
كانت داخل حفرة طولها حوالى 31.2 مترا،
وعرضها 2.6 متر،
وعمقها 3.5 متر.
لكن الغريب؟
ما كانتش مركب كاملة، كانت مفككة إلى حوالى 1224 قطعة خشب،
مرصوصة بعناية فى باطن الأرض.
كرم:
يعنى اتفكت؟
منصور:
لا، اتدفنت متفككة.
وتم تجميعها من غير ولا مسمار معدنى واحدن اشتغل كمال الملاخ مع المرمم أحمد يوسف على.
إعادة تركيبها قطعة قطعة.
كرم غير مصدق:
إزاى يعنى مركب بالحجم ده من غير مسمار؟
منصور:
كل جزء داخل فى التاني، ومتربط بحبال نباتية قوية.
تقنية عبقرية من أكتر من خمسة آلاف سنة.
كرم:
يعنى التكنولوجيا دى كانت موجودة من زمان قوى كده؟!
منصور:
وأذكى مما نتخيل.
كرم وهو يتأمل المركب:
طيب ليه نقلوها من مكانها جنب الهرم لـ المتحف المصرى الكبير؟
منصور:
علشان نحافظ عليها فى بيئة متحفية حديثة وآمنة،
تليق بقيمتها الاستثنائية،
وكمان لإزالة التشويه البصرى من محيط الهرم.
تم نقلها كاملة سنة 2021،
من غير ما تتفك،
ومشيت حوالى 8 كيلومترات فوق الرمال،
كأنها بتبحر للمرة التانية…
بس فوق الأرض.
وعلى فكرة، فى مركب تانية لخوفو، تم اكتشافها، ويجرى تجميعها حاليا بجوار المركب الأولى.
كرم:
يعنى هيكون فى مركب تانية كمان؟
منصور:
بالظبط.
كرم يقترب من مقدمة المركب،
ثم يتجمد.
ظل أسود طويل يمر أمام المركب،
غير واضح الملامح، لكنه رشيق الحركة.
كرم يرفع رأسه ويتحدق.
الظل يقف عند نهاية المركب،
ثم يختفى فجأة بين الممرات.
كرم بصوت منخفض:
إنت شفت اللى أنا شفته؟
منصور يتأمل المكان:
ده شيء من عصر الفراعنة.
شكلنا قربنا من سر جديد…
مش عن قطع أثرية،
لكن عن حيوان كان له مكانة خاصة جدا فى مصر القديمة.
كرم:
إيه هو؟
منصور بهدوء:
اللى أقدر أقوله لك دلوقتى…
إن اسمه «باستت».
كرم ينظر نحو الممر الذى اختفى فيه الظل الأسود…
وعيناه تلمعان فى صمت.

منصور وكرم ونيبو