التقى تليفزيون "اليوم السابع" ثريا عبد الله الشهيرة بأم محمد، 55 عاما، تعمل في فرن بلدي منذ أكثر من عشرين عاما، والتى قالت: "ربنا مقويني ومديني الصحة، وبشتغل أحسن ما أمد إيدى لحد".
وأضافت قائلة:" جوزى مات وساب لي 3 أولاد، محمد عمره 10 سنين وحسام 4 سنين وياسمينا كان عندها 6 سنين، اشتغلت وخليتهم كلهم كملوا تعليم عالي، ياسمينا خلصت كلية تجارة وحسام كلية حقوق ومحمد خدمة اجتماعية".
وأوضحت أم محمد:" أنها تعمل في مجال الأفران نظرا لظروفها الخاصة، لتقوم بتربية أولادها وتعليمهم، وأضافت: "أهلك لو هيدوكي، مش هيدوكي اللي يكفيكي، اكتر المواقف اللي خليتني بكيت بقوم من النوم قبل الفجر واجي في الساقعة او في الحر، بنزل الشغل وأنا تعبانة ومش قادرة أقف ولازم أنزل، أهم حاجة مخليش أولادي محتاجين لحد".
وأكدت أم محمد: "كل يوم بنبدأ شغل من الساعة 5 الفجر إلى الساعة 7 مساء، الناس مش سيباني في حالي، بيقولوا بصي الست اللي واقفة بـ100 راجل، الرجالة مبتقدرش تقف مطرحها مستحملة ازاي النار وكل اللي بيشوفنى بيقولى أنت ست بـ100 راجل".
وقال أحمد حسن صاحب الفرن البلدى الذى تعمل به أم محمد:" كانت بتيجي تشتري عيش من عشرين سنة، وجت قالت لي عايزة اشتغل، وهى بتربي أيتام، والحمد لله ربنا أكرمها وعلمت أولادها تعليم عالي، وهي شغالة معايا أحسن من 100 راجل".
وأضاف قائلا:" كنت بجيب الرجالة تشتغل يوم وتاني يوم متجيش، قالوا لي دي ست ازاي تشغلها في فرن، قلت لهم مفيش رجالة الشغل كتير بس الناس مش عايزة تشتغل، أم محمد ست أمينة، بتخاف علي الفرن بتجي من الساعه 4 الفجر لحد المغرب مش بتقول لا على الشغل".
تم أضافة تعليقك سوف يظهر بعد المراجعة