ننشر قصيدة جديدة للشاعر أحمد خالد بعنوان "الشقيانين".
وتشوفهم
تِدّيلهم سِن أكبر بكتير
م السن المكتوب ف بطاقة الشخصية
مَشَفوش ف حياتهم حِنّيّة
مَدَقوش الشَّهد
هَلَكِتهُم دُنيتهم
شَقِّتهم بدري
وهيعملوا إيه
والأحلام بتخون الوعد؟
وهيعملوا إيه
والأيام مهما تحاول تسبقها
تجرى وْتجري؟
ولا بِتْبَطَّل عَد وْزَغد
ولا بِتْمَشِّى طريقهم دُغري
وِتَمَلِّى بْيِتْعِرفوا بْجُمْلِة:
شَقْيان من صُغري.
وكإنها كود التعريف
ما ساعات الكلمات بِتْعَرّي
وساعات بِتْوَرّي.
مش بس الدم اللى بيكشف
للرائى نزيف.
تم أضافة تعليقك سوف يظهر بعد المراجعة