الرئيس السيسى: كل ظروف صعبة اختبار لكشف المعادن.. ومعندناش مشكلة فى الدولار
طمأن الرئيس عبدالفتاح السيسى المصريين، قائلا: "عاوز أطمنكم على الأوضاع فى الداخل.. صحيح بنمر بظروف صعبة جدا زى ما كل الدول تقريبا بتمر بده.. وده أمر مصنعنهوش بأنفسنا.. وقلت أن إحنا مدخلناش فى حروب واقتتال ضيعنا فيه قدرات الدولة المصرية ومستقبلها.. لا.. معملناش كده.. أحنا كنا حريصين فى كل ردود أفعالنا أن تتسم بالتوازن والحكمة فى التعامل مع كل المشاكل اللى بتقابلنا".
وأضاف الرئيس السيسى خلال كلمته أمام طلبة الكلية الحربية: "حتى موضوع الإرهاب فرض علينا فرضا، وحرصنا من أول يوم فى 2013 و2014 أنه ميحصلش أى شكل من أشكال الصراع والاقتتال لكن كان لازم نجابه هذا الاختيار".
وشدد الرئيس السيسى على أن الدولة تبذل جهدا كبيرا جدا للحفاظ على قدراتها، معلقا: "نقدر كلنا بالصبر.. ولازم نفهم أن ما نحن فيه هو نتاج ظروف أحنا مش سبب فيها، ولكنها ظروف دولية صعبة لها تداعيات كبيرة جدا على العالم كله، وأثرت كتير جدا على تكلفة الحياة سواء طاقة وسلع أساسية ومستلزمات إنتاج، والأسعار كلها ارتفعت فى الدنيا كلها".
وتابع الرئيس السيسي: "عندما يتساوى دخل الدولة من الدولار ومصروفها من الدولار الأمور هتبقا أحسن من كده، وده جهد بنبذله وقلت محتاجين نتحرك بسرعة ميبقاش عندنا حجم أكبر من اللى أحنا محتاجينه.. حجم الصادرات 50 مليار دولار طيب ده كفاية؟ لا مش كفاية.. بقول للشعب المصرى كله.. بنعانى.. لكن الحمد لله عايشين وهنقدر نعيش وياما مرت على مصر ظروف أصعب من كده والشعب المصرى بعزيمته وصبره وفهمه قدر يتجاوز الظروف دى وإن شاء الله هنتجاوزها".
وقال الرئيس السيسى، إن ما تحقق خلال العشر سنوات الماضية أمرا عظيما جدا ونفتخر به جميعا، مضيفا: "نشكر بيه ربنا سبحانه وتعالى أنه حققلنا النجاح ده.. يا ترى ده حافز لينا؟.. نعم ودافع لينا نكون جاهزين أكثر لحماية بلدنا".
أضاف الرئيس السيسى: "كل ما القوات المسلحة ومؤسسات الدولة المصرية قوية هتقدر تجابه التحديات المختلفة، واذا فرض عليها التحدى لا بقدراتها تمنع التحدى من الأصل.. فعندما تكون قادرا قويا مستعدا صدقونى ده تمن كبير قوى لمنع الصراع من أصله لأن العملية حسابية فاذا كانت الدولة قوية وقادرة بيمنع كتير من الشرور".
وتحدث الرئيس السيسى، عن أزمة الدولار قائلا: "كان فيه مشكلة كبيرة فى الدولار خلال الـ 3 أشهر الماضية، لكن بقول للناس وعدنا أنه خلال شهرين هننهى تكدس البضائع فى الموانئ، وانهينا جزء كبير منها ومعندناش مشكلة فى الدولار".
أضاف الرئيس السيسى: "القوات المسلحة بتقوم بدور مهم جدا فى الفترة الصعبة دى للتخفيف على الناس البسيطة واللى ظروفها صعبة والأسعار قاسية عليها بتوزع 3 ملايين كرتونة لغاية شهر رمضان للتخفيف ما أمكن عن كاهل المواطنين.
تابع الرئيس السيسي: "الأمور الحمد لله رغم انها صعبة لكن مسيطرين عليها وهنقدر نتجاوزها ومع بعض كلنا على قلب رجل واحد كل المصريين هنقدر نتغلب ونتجاوز الفترة دي..كل ظروف صعبة بتمر على أى دولة هو اختبار لقدرة الدولة وبتبقا اختبارات لكشف المعادن على كل المستويات الداخلية والخارجية ومعادن الدنيا كلها بتظهر فى الازمة وفرصة نتعرف على قدراتنا فى التحمل.
واصل الرئيس السيسي: "كل محنة بتمر علينا بفضل الله بتتحول إلى منحة بالإرادة والعمل والأمل أن احنا نقدر نتجاوز أى مسالة بفض الله سبحانه وتعالى".
وقال الرئيس السيسى، إن القوات المسلحة بالتعاون مع الشرطة تحقيق نجاح كبير فى تأمين الدولة المصرية، مضيفا: "بفضل الله بالتعاون مع الشرطة أن شاء الله حققت نجاح كبير قوى فى تأمين الدولة المصرية بما فيها المنطقة اللى بذلنا فيها تضحيات كبيرة جدا خلال 9 سنين، شهداء سقطوا وحماة للدولة المصرية وللشعب المصرى".
أضاف الرئيس السيسى: "حققنا نجاحا كبيرا قويا وقريبا بفضل الله سبحانه وتعالى نعلن أن الموجة اللى قابلتها مصر خلال العشر سنين الأخيرة تم الانتهاء منها والسيطرة عليها".
تابع الرئيس السيسي: "اوعى تفتكر أن النجاح بيجى من غير عمل وصبر وتضحية مفيش حاجة كده.. خلال السنوات الماضية قدمت الدولة المصرية من خلال أبنائها من الجيش والشرطة والمدنيين تضحيات كبيرة جدا سواء شهداء ومصابين وتكلفة مالية".
أكمل الرئيس السيسي: "بهنى القوات المسلحة والشرطة والدولة المصرية لأن الحمد لله حققنا إنجازا كبيرا فى هذا المجال".
تم أضافة تعليقك سوف يظهر بعد المراجعة