نقلة نوعية جديدة تشهدها العملات المصرية واللى هتخليها تواكب أحدث المعايير الدولية لطباعة العملة ،وهى بداية طرح النقود البلاستيكية فى مصر والمصنوعة من مادة "البوليمر"
ودا بعد ما أعلن البنك المركزى عن طرح فئة العشرة جنيه باستخدام أحدث خطوط إنتاج البنكنوت المطبقة فى العالم فى دار الطباعة الجديدة بالعاصمة الإدارية مع التأكيد إنه ما تمش إلغاء أى من الإصدارات السابقة من نفس الفئة واستمرار العمل بها وتداولها.
تصميم العشرة جنيه الجديدة معمول بطابع عصرى حديث ومبتكر وفيها بتتزين العملة بمسجد الفتاح العليم باعتباره أحد معالم الطرازات المعمارية الإسلامية بالعاصمة الإدارية وعليها شكل الحضارة الفرعونية ممثلة فى تمثال حتشبسوت اللى بيعكس هوية الدولة المصرية القديمة.
ومن مميزات النقود البلاستيكية إنها مرنة وقوية وفى نفس الوقت سمكها أقل دا غير طول العمر الافتراضى اللى بيوصل لـ 3 مرات عمر الفئة الورقية الحالية المصنوعة من القطن كمان بتعتبر مقاومة للماء وأقل فى درجة تأثرها بالأتربةده غير إنها صديقة للبيئة وقابلة لإعادة التصنيع ومقاومة للتلوث مقارنة بفئات النقد الورقية المتداولة بالإضافة لصعوبة تزييفها أو تزويرها
السؤال الأهم نقدر نحصل على العشرة الجنيه الجديدة دى إزاى ومنين؟ طبعا تقدر عن طريق شبكة فروع البنوك المصرية اللى بيتجاوز عددها 4500 فرع بنك أو عن طريق ماكينات الصراف الآلى ATM واللى هيتم تجهيزها فنيًا لصرف الفئات دى من ماكينات مخصصة قولنا رأيكم فى شكل العملة الجديد؟
تم أضافة تعليقك سوف يظهر بعد المراجعة