القارئ نصر فتحى اللوزى يكتب: الأسعار.. والدولار

قلنا يا صبر صـــبرنا على ابن الإيه الـدولار

كان فى الأيـام اللى فاتت أسـد والجنــيه فار

السعر فرغ عينه بلطجى لا يــشق له غـبار

بياع البساريا كتب عليها سـعر كأنها كافيار

الجـرجير بقاله سعر آل إيه صـــهر الدولار

كانت الجــيوب بتلطم حظها من نار الأسعار

كان الهم والغم للأكل والدوا الفقر بنا شـعار

كان طعم الحلق مر والحـلو علقـم بكل مرار

كان الشاى فاكهة الفقير لون وطعم الصـبار

كان السلف فى العلن فضيحة ماتت الأسرار

الحمد لله يا ابن الإيه كل يوم نازل فى انهيار

الجنيه شرب عرقنا شد حيله الليل بقى نهار

الشمس كتبت بالعرق الصبر بالـخير إصرار

رسمت مشنقة للدولار عزيمة فوق كل جدار

الدولار غرق فى عرقنا على أهبـــة الانتحار

الامل زغرد الجيوب المهجورة هتبقى عمار

المعدة هتعرف لأول مرة اللحمة مع الخضار

السلطة هتزور بيتنا طماطم بصل كمان خيار

سـعر العلاج من الأجزاخــــانة يذل كل دولار      

شريكة العمر قالت هات وهات ياسيد الشطار

قلت حاضر هجيب كمان كيلو لبن دسـم ابقار

وصلت السوق الأسعار سم ألوانها بخت نـار

الدولار ارتفع السعر بالجيوب غراب بنا طار

الدولار نزل السـعر متعنطز كل يوم بنا غدار

ابن عاق معاه طالع بلطجى أشر من الأشرار

ينزل الدولار السعر عاق فى العالى كله عوار

زى بنت ليل ماشيه على حل شعرها استهتار

ملعون الحبل اللى ربط عيشــتنا بأم كل دولار

السعر بلـطجى يطلع ماينزل لو عملت له زار

الليمونة ست الكل ماتحبش فى الســعر هزار

آل ايه صاحبة بنت اخت السنت تروى اشجار 

الرقابة قزم والاسعار ظلم لا يشق لها غـــبار

ياحكومة خافى ربنا يوم ابدا لا توبه ولا فرار

امتى هصدقك ودموع قلبى تبطل منك انهمار

باحبك ياحكومة ارحمينا خافى المنتقم الجبار                      

قولى للسعر عيب ارجع بالتوازى مع الدولار

الجلابية قالت بلاش جيوب بتحرقها الاســعار

ليه ماتت الرحمة بسكينة الجشع ياكل التجار؟