زوجة على الحجار لتلفزيون اليوم السابع: متصورتش أنى هتجوزه.. والفنان يداعبها بأغنية

قالت هدى طلعت زوجة المطرب الكبير على الحجار، إنها كانت إحدى المعجبات، ومن جمهور على الحجار، مضيفة:"مكنتش أتصور أنى هتجوزه فى يوم من الأيام، والبيت عندنا كله كان بيحب على الحجار كمطرب ونتابع أعماله، ومتخيلتش الصدفة اللى جمعتنا وأنا محظوظة بيه".

وقال المطرب على الحجار خلال لقائه بتلفزيون اليوم السابع احتفالات برأس السنة: "بقالنا 18 سنة متجوزين، وكل يوم حبنا بيزيد، وأولادنا سبب فى زيادة حالة الحب بالبيت، وهدى مراتى عارفة كل تاريخى، وأنا بأحكى كل حاجة عنها وعمرى ما خبيت عنها حاجة، والحقيقة كل المرات اللى اتجوزت فيها كان فى مشاكل، ولما اتعرفت عليها رحت لهم البيت في المنصورة، وقلت لها حضروا المأذون، وكنت أول مرة أكون مرتاح وأنا بأتجوز، وكل ما كنت ببص في عينيها كنت بأفرح أكتر".

وداعب المطرب على الحجار زوجته خلال اللقاء وغنى لها أغنية "انتى طلعتيلى منين ودخلتى حياتى إزاى.. فى عنيكى حنان وحنين وفى صوتك بحة نااى.. انتى طلعتيلى منين ودخلتى حياتى ازاى.. فى عنيكى حنان وحنين وفى صوتك بحة نااى.. طيبتك خلتنى صالحت الزمن الكداب النساى.. وفتحت بيبان للفرحة الجاية فى العمر الجااى.. طيبتك خلتنى صالحت الزمن الكداب النساى.. وفتحت بيبان للفرحة الجاية فى العمر الجااى.. وبحبـــــك ... بحبك.. بحبك بكل الحنان اللى فيكى.. واحبك بكل الجنون اللى فييا.. بحبك بكل الحنان اللى فيكى.. واحبك بكل الجنون اللى فييا.. واحبك الرضا والسماحة فى عنيكى.. واحب ابتسامة شقيه خفيه.. وسلمت عمرى آمانه فى إيديكى".