قالت هدى طلعت زوجة المطرب الكبير على الحجار، "إن زوجها طيب ومالوش طلبات، لكن أكتر حاجة بتضايقنى منه أثناء مناقشتنا، ألاقيه يتكلم بسرعة علشان ينهى الحكاية بأى كلام، وأنا بحب المنطق في الحوار، إلا أنه بيقول كلام مش منطقى وبأفهم أنه عايز يخلص الحوار".
فيما قال الفنان على الحجار رداً على سؤال المذيعة دينا شرف الدين خلال لقائها على تليفزيون اليوم السابع، فى حلقة رأس السنة: "يومياً هى بتعمل حاجة بتضايقنى، دايما بتعمل الست الناظرة، بس الحقيقة هي طول الوقت بتقدم نصائح لى".
وحكت هدى طلعت زوجة المطرب الكبير على الحجار، قصة "أغنية عارفة"، قائلة:" الغنية دى لها قصة، أول ما تعرفنا أنا وعلى الحجار، بعت لى كوبيله من الأغنية، وتأكدت أنه بيحبنى بعدها".
وداعب المطرب على الحجار زوجته خلال اللقاء وغنى لها أغنية "عارفة" والتي كتبها بهاء جاهين وتوزيع عمر خيرت والتي كلماتها " عارفة.. مش عارف ليه.. متونس بيكي وكأنك من دمي.. على راحتي معاكي وكأنك أمي.. مش عارف ليه.. عارفة.. حاسس إني لأول مرة بشوفك..وإني بشوفك من أول لحظة ف عمرى.. حاسس إني يمامة بتشرب ف كفوفك.. وانك شجرة وضلة وميه بتجرى.. عارفة.. فرحة كبيرة وصوت مزيكا ف قلبى.. وكأننا حبيبين اتقابلوا بعد فراق.. ليه فجأة بقيت مستنى لوحدى.. بدي اتكلم وأحكيلك وأشكيلك همي.. عارفة.. ونا وياكي بحس بدنيا.. دنيا سلام وأمان.. وإن العالم مفيهوش ولا نقطة أحزان.. إيدك خليها ف إيدي.. انا طفل كبير.. وبحس ان أنا وانتي لوحدينا والكون بستان".
ويحتفل تليفزيون اليوم السابع، برأس السنة، حيث يستضيف عددا من النجوم، فى سهرات خاصة، احتفالا بالعام الميلادى الجديد، وذلك فى إطار الفقرات المنوعة التى يقدمها للمشاهدين.
تم أضافة تعليقك سوف يظهر بعد المراجعة