خالد صلاح

برعاية سوبر كورة

سوبر كورة

عشان متشلش هم.. إزاى توصل معرض الكتاب بسهولة لو أنت من سكان الأقاليم والقاهرة

الإثنين، 21 يناير 2019 06:00 ص
عشان متشلش هم.. إزاى توصل معرض الكتاب بسهولة لو أنت من سكان الأقاليم والقاهرة موقف أتوبيسات - أرشيفية
كتب محمد عبد الرحمن

مشاركة

اضف تعليقاً واقرأ تعليقات القراء
ينتقل معرض القاهرة الدولى للكتاب هذا العام من مكانه القديم بأرض المعارض بمدينة نصر، إلى مكان آخر مجهز بأحداث الطرق للمعارض الدولية، وهو مركز مصر للمعارض الدولية بالتجمع الخامس.
 
فى الماضى كان الذهاب إلى معرض الكتاب أشبه بنزهة، خاصة لسهولة الوصول للمعرض عن طريق مترو الأنفاق، باعتبارها الوسيلة الاسهل، وهو ما اعتبره البعض بأن نقل دورة اليوبيل الذهبى لمعرض الكتاب، سوف تتأثر لعدم توافر وسيلة المترو فى الوصول للمكان الجديد، ولكن على رأى المثل "المواصلات ما خلتش"، وللجمهور الذى يأمل فى زيارة المعرض، نقدم إليهم طريقة الوصول لمركز مصر للمعارض، من كل الأماكن الرئيسية العامة فى القاهرة الكبرى، وليكون الوصول للمعرض متاح لسكان القاهرة الكبرى والأقاليم الأخرى بكل سهولة.
 
- الطريق الدائرى مصر إسكندرية الزراعى
 
لو أنت جاى من الأقاليم ممكن تنزل سلم الدائرى اللى قبل شبرا، وهناك عند السلم هتلاقى ميكروباصات التجمع الخامس، وتنزل مركز مصر للمعارض الدولية اللى فيه المعرض.
 
ولو أنت وصلت شبرا الخيمة عند ميدان المؤسسة توصل الناحية التانية ناحية موقف الأتوبيسات جنب عربيات بيجام، وهتلاقى ميكروباصات التجمع، وكمان أتوبيسات من نفس الموقف بتروح التجمع.
 
لو أنت مش عايز تعدى ناحية موقف الأتوبيسات هتركب عربية من قدام مستشفى النيل هتروح موقف السلام، وتنزل هناك هتلاقى عربيات توديك محور المشير. 
 
- المنيب
 
لو أنت جاى من الجيزة أو أكتوبر هتلاقى بجانب محطة مترو المنيب ميكروباصات التجمع الخامس.
 
ولو جاى من ميدان الجيزة فيه موقف أتوبيسات فيه خطين أتوبيسات للتجمع الخامس. 
 
- الحى العاشر
 
لو أنت جاى من مدينة نصر ممكن تركب أى عربية للحى العاشر.. هتلاقى موقف التجمع الخامس.
 
- موقف السلام
 
لو أنت جاى من الأقاليم أو قريب من موقف السلام.. هناك هتلاقي ميكروباصات وباصات التجمع الخامس باستمرار.. وأتوبيسات النقل العام 505.
 
- السيدة عائشة
لو أنت جاى من أكتوبر أو المعادى ممكن تركب أى ميكروباص للسيدة عائشة وهناك هتلاقى ميكروباصات للتجمع الخامس أو أتوبيس النقل العام 716.
 
لو جاى من السويس انزل المنيب وخد من هناك عربيات التجمع.
 
لو جاى من إسماعيلية أو بورسعيد انزل موقف السلام الجديد وهناك هتلاقى ميكروباصات ومينى باص للتجمع، أركب محور المشير.
 
- رمسيس
 
لو أنت جاى بالقطار من أى مكان أو قريب من وسط البلد عمومًا.. ميكروباصات التجمع الخامس هتلاقيها عند مسجد الفتح.. وهتلاقى أتوبيسات النقل العام رقم 1064 و1018.
 

* المواصلات اللى فوق دى متوفرة طول السنة وتقدر تركب منها عادى فى أى وقت، لكن كمان فى خطوط حصرية من مواصلات مصر مخصوصة، لزوار معرض الكتاب "هتلاقى على الأتوبيسات لوجو المعرض"، وكمان هياخدوا خصم 35% على التذكرة لو دفعت بكارت الدفع الذكى اللى تقدر تشتريه من أى سائق وتقدر تشحنه عن طريق فوري:

 
- خطوط حصرية:
 
الخط الأول .. صقر قريش - معرض الكتاب
 
يبدأ من منطقة صقر قريش مرورًا بكارفور المعادى ونادى وادى دجلة والطريق الدائرى ومحور المشير ثم معرض الكتاب.
 
الخط الثاني .. التحرير - معرض الكتاب
 
يبدأ من ميدان عبد المنعم رياض مرورًا برمسيس والعباسية وجامعة الأزهر ومحور المشير ثم معرض الكتاب.
 
الخط الثالث .. العباسية - معرض الكتاب
 
يبدأ من العباسية مرورًا بنادى السكة وجامعة الأزهر ومحور المشير ثم معرض الكتاب.
 
الخط الرابع .. ميدان الجيزة - معرض الكتاب
 
يبدأ من ميدان الجيزة مرورًا بجامعة القاهرة والسيدة عائشة والاتوستراد وجامعة الأزهر ثم معرض الكتاب.
 
الخط الخامس .. النزهة - معرض الكتاب
 
يبدأ من النزهة الجديدة مرورًا بميدان الحجاز والسبع عمارات ومكرم عبيد ومصطفى النحاس والمنهل والوفاء والأمل ثم معرض الكتاب.
 
الخط السادس .. الأميرية - معرض الكتاب
 
يبدأ من الأميرية مرورًا بميدان المطرية والحلمية فكلية البنات وميدان رابعة والحى السابع وحى السفارات ثم معرض الكتاب.
 
 

مشاركة

اضف تعليقاً واقرأ تعليقات القراء

التعليقات 2

عدد الردود 0

بواسطة:

نبيل السيد

حسوا بينا يحس بيكم ربنا

بالسهوله دى طب ماحدش فكر سعر المكروباصات كام عشان نوصل للمعرض فى التجمع الخمس على الاقل 30 جنيه للفرد ذهاب وعوده يعنى الاسره من اب وام و3 اولاد يدفع بس 150 جنيه مواصلات وطبعا الفرق كبير لما كانت قريبه فى ارض المعاض فى صلاح سالم . .وسترون ان الاقبال سيكون ضعيف جدا .

عدد الردود 0

بواسطة:

مواطن مصري

بلاها معرض

وأية اللي يخليني ادب المشوار دة كلة بصراحة ناس بتفهم صحيح وكالة ارض المعارض القديمة تلاقي حد حاطط عينة عليها

اضف تعليق

تم أضافة تعليقك سوف يظهر بعد المراجعة





الرجوع الى أعلى الصفحة