منذ فترة فى المنطقة العربية وفى دول الشرق الأوسط تحديدا بنمر بأزمات متنوعة ومؤثرة إلى حد كبير، أزمات كان ليها صدى ومدى كبير جدا محليا وعالميا، ولكن، أبرز ما في#مصر تحديدا أنها وقت الأزمات بتتحول إلى ما يشبه صالون ثقافى كبير، صخب وصوت عالى ودوشة كتير، أى نعم بيبقى غالبه رغى وتناقض وأى كلام، لكن بشكل عام تحس أن المصريين بيجمعهم إطار واحد، بتتحرك البلد كلها بضمير جمعى واحد، كتلة واحدة، وده حتى تاريخيا موثق ومثبت، كانت فى عصر القبط كلها أقباط وتشيع المصريون بالكامل فى عهد الفاطميين وتحولت بالكامل للمذهب السنى فى توقيتات قياسية، وقت ثورة 19 و 52 و 25 يناير و 30 يونيو وغيرها كلها شاهدة على التحول الجمعى، خلاصة الأمر هتلاقيها متجسدة فى طبيعة مصر تاريخيا كدولة مركزية "الإدارة" و "الإرادة" منذ عهود الفراعنة، ده أمر مهم جدا أراه إيجابيا لأنه بيصعب مهمة "تفتيت" البلد دى لاحقا، أنا على ثقة تامة أن ليبيا هتبقى 3 دويلات بحكم فيدرالى وسوريا وارد جدا تبقى اتنين وكذلك اليمن والعراق وده مخطط هدفه طمس هوية البلدان دى للابد _ لا قدر الله .
الأزمات فى مصر لها تأثير مختلف، بتخلق روابط جديدة بين المصريين وبتعمق إحساسهم ببعض وبتثبت جذورهم أكتر حتى لو بدر منهم إحساس لحظى عكس كده، وقتها بيبقى احساس مزيف بالغربة فى بلدك تحت ضغط الظروف الصعبة اللى بيتحول تماما لو الأزمة مرت أو ظهر بوادر لحلها أو نسيناها بحكم التعود، وبتلاقى نفسك بتتنشق على أى إنجاز أى انتصار فى اى اتجاه، أيا كان ملموس أو غير ملموس علشان تقول "مصر" .، وقتها بننسى كل حاجة و بيبقى نقطة ومن أول السطر فى حب مصر ..
تم أضافة تعليقك سوف يظهر بعد المراجعة