يجوز
الماضى أفضل م اللى جاى جدًا
عشان عشناه
ساعتها العمر كان مليان
حاجات حلوه ودوبنا معاه
عنيها بتكتب الغنوة بلون الورد
وكنت بحس أنفاسها بريحة ورد
وصوتها كان يدفينى ف عز البرد
كنت بهرب منى ليها
بحضن كبير بخبيها
بلمستها بتمحى كل تنهيدى
بتجرى الفرحة ف وريدى
بتعشق ضحكتى جدًا..
وأنا بضحك معاها وبس
كان القلب من غيرها
بيحلف أنه مش هيحس
يجوز ألقاها يوم صدفة..
يجوز الصدفة لحظة تكون.. معاد سابق
عشان تسعدنى وأسعدها بنتسابق
بتحضن كل تفاصيلى وأوقاتى
من الممكن
ومش مضمون
أعيش وياها باقى العمر
وارجع ماضى يرسم لينا مستقبل
بحس بإنى غير بعنيها مش هقبل
يجوز الماضى كان دخان
لكنه ساب أثر جدا ف تنهيدى
يجوز الفرحة ف الماضى
سبب كافى لتجاعيدى
يجوز الدمع ف الحاضر
بقايا حنين من الماضى
ماهوش معقول هتدمع عينى
طول الوقت ع الفاضى
يحوز الكسرة والحسرة على فراقك
بتظهر كل م بشوفك
بحس بإنى طير مأسور..
وفك الأسر بكفوفك
بحس القلب زى قزاز ومتكسر ومتلزق
بنبض الذكرى وحروفك
بصوتك لما بتجينى وتاخدينى
بترمى حياة بتنبت جوة شرايينى
يجوز نبعد.. ومانقربش
يجوز نفرح.. لكن الفرح مش دايم
يجوز بنحب وبنعشق
لكن الحب شىء ملعون
ف لحظة بتملك الدنيا
ولحظه بتتخنق م الكون
يجوز هتكونى .. يجوز راح أكون
يحوز للدنيا بالفرحة هعيش مديون
تم أضافة تعليقك سوف يظهر بعد المراجعة