كل نقطة دم فوق الرمال
غنوة حب فى كل المحافل
بعض اللى اندفن من الجسد
كان مهر للحرية من غير تنازل
أما الجروح بالعزة تبوح
أوسمة حق تدوس كل باطل
الجسد نام فى بطن الرمال
نبت كرامة بنور كل المشاعل
زى جذور الورد مهما اتقلمت
تعيش لكل الأجيال فى المشاتل
يحميها وخز الشوك
يركع تحت رجليها الجحافل
وتفضل العزة نور يغزل أمل
لفستانها والقلب نول ومغازل
ولون الصحرا بينا يبقى أخضر
والخير بأيادينا بفستانها سلاسل
كل نقطة دم كل جرح شايله جسد
تشوف بهم الكرامة تعيش سنابل
كل سنبلة فيها مليون شهيد
يكتب للأمن والأمان بالحب رسايل
دى أول الحدوتة فى أكتوبر
صنعنا النصر على كل الأراذل
كان زلزال رسم خطوط الخريطة
للعرب ركعت له كل الزلازل
كل مصرى بالإخلاص والشهامة
تاج كرامة للعالم فى كل المحافل .
