يا عم يا عطار ادينى من الصبر قرطاس
شويه منه على ابليس الزور من الناس
ماشى يهلفط فاقد العقل من دينه افلاس
ياكل الحقوق ينهش العرض واد هلاس
لسانه سموم تعبان يدنس مقشة الكناس
منه شويه للى يصدق كلام اخو الرفاس
ومنه شويه للى عايش بأفعال الأنجاس
مخدرات وخطف واغتصاب بالوسواس
لا هو مع المسلمين ولا اجراس القداس
ولا مع اللى بيعبد بوذا وكريشنا ينقاس
ولا مع اللى بيعبد الحجر وكل الاخراس
ومنه شويه للى اصم ودانه بقى نخاس
ضحيته تصرخ مخه بقى مسمار مداس
ومنه شويه لتوكتوك اللص والاختلاس
الواد النونو سواق كأنه فى حالة نعاس
وأخوه سواق هجر المدرسة والكراس
والشاطر ترك المحرات ومكنة الدراس
سرق المهن وعلم البلطجة والافتراس
ضحيتة متفحمه او عايزه مننا غطاس
وبدل البسمة بالدموع من غير احتباس
بقى اداة كل جريمة فى ليالى الاعراس
وجسد الضحية متعبية للبيع فى اكياس
ياعم ياعطار ادينى كمان اتنين قرطاس
واحد يصبرنى على كل مسئول محتاس
مش عارف يعمل ايه مع ولاد الانجاس
مع أن القانون للعدل موجود لنا نبراس
يتحقق الامن بالدستور من غير التباس
والتانى ازرع به شجرة صبر واحساس
اوزع منها عزيمة الاصلاح بكل حماس
يطرح عرقنا كرامة وعزة زى الاناناس
وارسم الامل لبلدى بسمة فى كل كراس
واقول للعشوائية باى باى تحت المداس
تم أضافة تعليقك سوف يظهر بعد المراجعة