يعنى إيه قالها بالدموع فقير
لما الرحمة تنام فى الاضابير
توك توك رافع شعار لنا تدمير
يتلولو كأنه شارب من خمير
محتار وفجأة عضمى تكسير
هرب زى فار جوه الحواكير
فاقد الهوية والنمر والضمير
قاموس السفالة ومعاه شهير
فى مستشفى الحكومة الكبير
كل امكانياتهم الاشعة بالكتير
الاشعة قالت دا كسر وخطير
الدكتور كتب ورقة بالتكشير
اوامره زى كل سواد أمشير
نظراته سهام للضلال تزوير
من بره هاتوا قطن وتطهير
وشوية شرايط جبس لتجبير
وكام سرنجة وحقنة تحضير
كان ناقص يقول كمان سرير !!
كله سواسية جروح وبواسير
رمد واسنان وعجوز وصغير
وانف وحنجرة وسماع صفير
والحامل الفقيرة ام الهم الكبير
كل علاج من بره بدون تفكير
يعنى ايه ده يا معالى الوزير ؟!!
ماتقوليش عن مشروع كبير
انت اعلم بسلم ماسلو بتدبير
اول درجة توفير علاج للفقير
كفانا تصريحات الامر خطير
سلقونا كأنهم بيجهزوا تحمير
سألنا فين الباشا فين المدير؟
مفيش رد كأننا سوق الحمير
عصروا جيوبنا بالدين تعصير
فى صيدلية خاصة همى كتير
سايق عليك طه تقول يا وزير
هتقول ايه وقت حساب عسير ؟ !!
خافوا ربنا وكفانا منكم تقصير
دعوة مظلوم مقبولة عند قدير
اتقوا يوما به كفن الموت نذير
***
