دق الجرس
ودقت الأجراس
للصلاة فى يوم عيد السعف
خرجت زهور للرب
بالحب زى النجف
خطوة بترقص ورا خطوة
الفرحة بتسابق فرس
تسبق كل الأفراس
الصبح بدرى
الشمس خجلانة زى العروسة
أصوات العيال
زى البلابل جوه الأمل مغروسة
ريحة الزهور من الفل والياسمين
فاحت فى شوارع المدينة
بتعزف غنوة العاشقين
للرب مع دقة الأجراس
رسمت فى القلوب فرحة
بلون الورد والألماس
الفرحة بعقد الفل دخلت كل كنيسة
مع الترانيم بالحضن نرجيسه
فجأة بلا مقدمات
الطاووس على الأرض مات
الريش بقى علامات
مع الدم فى سبات
رسم قلب طفلة فى إيدها السعف حلقات
كاتب بكل اللغات
لموا الريش
ألوانه بقت رفات
يا ضمير العالم دقوا للزفاف أجراس
قلوب صافية فى السما أعراس
قيدوا الشموع
أبدا مصرنا لا ركوع
أرض الأباء
على أرضها خطوات الأنبياء
من الرب محروسة
بأرواح ولادها
بأجراسها بمآذنها
فى الدنيا هى العروسة
سكت الجرس
سكتت كل الأجراس
فى ليلة حزن بكت القلوب
مع القداس
***
