دنيا تعفرت دنيا تجنن
كل يومين على وشى تعلم
وأجى أراضيها تقولى يحنن
كل ما فيها مش مفهوم
نفسى فى مرة خيرها يدوم
وأرجع أنام وأنا مش مصدوم
عشمان مرة تِضَحك عينى
وتصفى اللى ما بينها وبينى
وأفرح بيها وفرحى يدوم
دنيا غريبة فى كل أفعالها
زى ما جدى قال يوم عنها
دنيا لئيمة بطبع غَرور
العاقل فيها يعيش مستور
علشان بكرة يموت مغفور
دنيا وماشية مش بالدور
العيان يدى الدكتور
مش قولتلكم دنيا غريبة؟
دنيا بجد أحوالها عجيبة
تدى بِكَتراَ للاعيبة
وفاتحة جيوبها للكَسيبة
والغلبان تديله مصيبة
أيوه بتضحك للى معاه
والمحتاج توجعله قفاه
دنيا بتاخد م المحتاج
واللى معاه تديله التاج
دنيا تعفرت دنيا تجنن
دنيا وفيها أغرب عادة
اللى معاه تديله بزيادة
وللمحتاج الصبر عبادة
وتيجى تقولها كُخ وعيب
تقولك خيرى يا حلو نصيب
للموعود دايما بيصيب
دنيا الطيب فيها عبيط
والنصاب من حقه يظيط
وبرضه تحط على الغلبان
وتِكسر دايما فى العدمان
وتفضل حاطه عليه وتزود
ولسان حالها يقوله اتعود
اصرخ جامد يلا وزود
صوتك حلو سمعنى وجَوِد
دنيا تعفرت دنيا تجنن
دنيا وكل ما فيها شمال
تضحك دايما للأندال
وتقلب بوزها على الجدعان
تقلب بوزها وعامله بريئة
وهى بِتقلب كل دقيقة
دنيا وفيها الناس طماعة
حاسس إنى فى قلب مجاعة
دنيا بتدى للهباش
اللى حياته عايشها بلاش
وبرضه بتاخد م الشحات
اللى عايش على قولة هات
دنيا تعفرت دنيا تجنن
كل يومين على وشى تعلم
وأجى أراضيها تقولى يحنن
تم أضافة تعليقك سوف يظهر بعد المراجعة