يا دنيا بتسودى
وأيامك ما بتعدى
راكبه معايا شمال
ومشمته العزال
لا فى مره بطبطبى
ولا عايزه تتهدى
أنا اللى عايش فيكى
وعاشق سمار لياليكى
ليه فيا بتعاندى ؟!!!
فارده عليا قلوعك
ما أعرفش أيه موضوعك
وليه فيا بتزلى
ــــــــــــــــــــــــــــــــــــــــــــــ
أأأه يادنيا يا بنت التيت
يا مركبه الخراتيت
وللحُر بتجُرى
عارفه هاقولك أيه ؟
المٌر خدت عليه
وفى عروقى بقى يجرى
غمك وشاربه كاسات
ليه بترفعى الهفاقات
وتجيبى وتودى
فاكرانى هاجرى وراكى
واطلب فى مره رضاكى
معلش كان وِدى
لكنه ما بيَدى
ـــــــــــــــــــــــــــــــــــــــــ
أنا حالف ما أبات مغلوب
ولا هارضى بالمركوب
فى يوم يكون حقى
أنا اللى مجروح ياما
وكلى ألم وملامه
والكيل طفح منى
فيا ريت تلمى معايا
وكفايه مر كفايه
الصبر عملته حكايه
وبقى يشتكى منى
ـــــــــــــــــــــــــــــــــــــــــــــ
يا رب يارب الكون
مسكين وطالب عون
والفضل من عندك
إصلح يا رب فى حالى
وريحلى كمان بالى
ودى دعوه من عبدك
عشمان فى وجه كريم
ما تشمت فيا لئيم
وتِقبل يا رب دُعايا
وسدد كمان فى خٌطايا
ويا رب اكرمنى
وهاختم كلامى بقول
عاشق يا خلق رسول
يوم القيامه يقول
يارب شافعنى
صل الله عليه وسلم
