روت فتاة تدعى "ماريانا يونان" عبر صفحتها على موقع التواصل الاجتماعى "فيس بوك" قصة تعرضها لمحاولة تثبيت على الطريق الدائرى فى الساعات الأولى من صباح الخميس، ورصدت خلالها المعاناة التى تعرضت لها خلال تلك الأزمة، والحيلة التى لجأ إليها اللصوص لمحاولة سرقتها، وسلطت الضوء على التقصير الأمنى فى تأمين تلك الطرق.
وقالت ماريانا، "أثناء سيرى على الطريق الدائرى المتجه لمدينة 6 أكتوبر، وفى غضون الساعة 1 بعد منتصف الليل، فوجئت بعربية ماشية جنب عربيتى وبتستكشفها، مين سايق واحد ولا واحده؟ وهل فى حد تانى فى العربية ولا أنا لوحدى؟ بعد كده جت العربية من شمالى وطلعت قدام شويه وواحد راكب جمب اللى سايق من ناحيه عربيتي ورمى من شباك عربيته دبشه كبيره جدا قدامى، حاولت تفاديها بقدر الإمكان معرفتش طلعت عليها بالفرده الشمال الأمامية، ففرقع الكاوتش والعربية بسرعتها".
وأضافت "ماريانا" خلال التدوينة:"الطبيعي كنت أخد يمين وأركن بس لو كنت عملت كده في عز الظلام ده كنت هبقي بسلمه نفسي، ربنا إداني حكمة إني فضلت بسرعه العربيه وبحاول السيطره عليها بس محافظه على إني أفضل في نص الطريق علشان أبقي متشافه من الناس بقدر الإمكان لو العربيه وقفت تماما وعيني بتلمح العربيه اللى رمت الدبش مكانها فين منى، ولاحظت أنه كان بيحاول يكون على نفس مستوايا على الطريق وعنده أمل إنى أخد يمين وأركن".
وتابعت:"الحمد لله بعد ما سيطرت علي العربيه وبدأت تهدي سرعتها مدوستش فرامل خالص علشان تفضل ماشيه في نص الطريق اكتر وقت ممكن، بعدها فوجئت بالعربية اللى كانت بتطاردنى زودت سرعتها وطلعت قدام، ربنا أكيد زرع الخوف في قلوبهم، وكان على يمينى موقف ميكروباص اللي حد ما منور وناصبه شاي، فاطمنت وقررت انى أخد يمين وأركن لما اتأكدت انهم مشيو خالص".
وأضافت "ماريانا"، كان معايا على الهاتف صديقتى "مروة كاظم" من أول ما طلعت الدائرى، وطلبت منها تقفل وتتصل بحد يساعدنى، وبعدها اتصلت بـصديق ليا إسمه مينا عادل، لأن النجدة أكيد مش هيردوا ولو حتي ردو مش هيوصلو غير بعد خراب مالطة، ودار بينا الحوار التالى:
أنا:مينا تعالالى بسرعه انا كنت بتثبت والكاوتش ضرب وانا واقفه علي الدائري
مينا :انتي فين ؟
انا:معرفش في حته منوره شويه عند موقف ميكروباص ونصبه شاي علي الدائري بعد مطلع ميدان لبنان
مينا:خليكي معايا متقفليش هلف من علي الدائري وارجعلك
وتابعت ماريانا حديثه عبر التدوينة، الخط قطع وحاول مينا الاتصال بيا ولكن موبايلي كان مغلق، وغالبا أتاكد ساعتها إن كده أنا بتثبت خلاص، فقرر أنه يلف من فوق الدائرى من أى فتحة يلاقيها، و أول ما لف لجنه وقفته، ودار بينه وبين رجال أمن الكمين الحوار التالى الى يعتبر من أعظم المواقف الى ممكن تعرف بيها إنك إنت أكيد فى مصر.
أمين شرطه :رخصك
مينا:لو سمحت أختي بيثبتوها علي الدائري تعالي معايا نلحقها
الأمين:ماليش دعوه أنا مرور كلم النجدة تروحلها انت دلوقتي هيتعملك محضر وتتاخد منك العربية
مينا:بقولك أختي حضرتك بتتثبت عارف إني ماشي غلط بس حط نفسك مكاني وأرجوك بسرعة
الأمين:مش موضوعي حضرتك وانزل من العريية
وأضافت "ماريانا"، خلال ذلك الوقت كلمت حد تانى ووصل أصحابه ومعاهم مروة كاظم، مينا مازالوا متحفظين عليه هو والعربيه في الكمين، فحاولت الاتصال بيه أكتر من مرة فرد بعد رابع مرة وقالى خلاص جايلك، وأكد ان الأمين ركب معاه وقاله متردش علي الى بيرن عليك ولا تمسك الموبايل وهات كل اللى فى جيبك ، وعرفت مينا صور الأمين بالحوار الى دار بينهم والحمد لله على كل حاجة.
.jpg)
.jpg)
عدد الردود 0
بواسطة:
امين مينا
كذب
لو كلامك صح هاتي ما يثبت ان مينا ده اتحجز و في القسم و لا محجوز كده من غير اثبات ... لو كان راجل ماكانش وقف في الكمين و كان جري منه و خلاهم يجروا وراه ... انتى عايزة تشنعي علي البلد و خلاص ... ازاي العجلة العجلة الشمال الامامية مفرقعة وانت ماشية علي الدائري يعني بسرعة و العربية ماتقلبتش ... ليه فاكرة انك جون سينا
عدد الردود 0
بواسطة:
محى اباظة
اكيد انت في مصر
ام الدنيا .. الحوار ساخن جدا لكن فية ملحوظة.. قلتى ان تليفونك قفل ومينا معاكى على الخط ازاي انتى اتصلتى باصدقاء اخرين وجاتلك صحبتك .. ممكن تكونى شحنتية من النور الضعيف جايز .. بس دا مايمنعش انك في مصر
عدد الردود 0
بواسطة:
ايمان على
فى كذا ثغره فى القصه دى
الفرده بتاعت العربيه اللى فرقعت والعربيه فضلت ماشيه التليفون اللى اتقفل ورجع يشتغل الأمين اللى ركب العربيه مع اخوكى ازاى طلب رشوة وقاله مايرد على الموبيل كان خد رشوة وسابه واخوكى الحجز ليه دى مخالفه مرور
عدد الردود 0
بواسطة:
مصري اصيل
تصبح على خير
االمهم صحيتي من النوم وقفلتي التكييف ولاسيبتيه شغال
عدد الردود 0
بواسطة:
تامر
..
هو بس فى نقطه ان فى بعض رجال القانون يستغلون جهل من امامهم بالقانون ليتم اخذ توقيعاتهم على محاضر ولو وهميه او اثبات حاله لاشياء لم تتم وكذلك محاولات للتهديد المواطنين لكى يرسم نفسه انه ظابط وبتاع او امين شرطه / للاسف مش مهم يكون فى حبس ولا لا ولكن المهم انه يخوف اللى قدامه وبفرد شخصيته او عضلاته
عدد الردود 0
بواسطة:
M
مؤلفه فاشله
فين صور العربيه والعجله اللي فرقعت ..كمين ايه اللي علي الدائري ومينا ييلف ودخله عكسي?!
عدد الردود 0
بواسطة:
مش مهم
الامان
ربنا ستر عليكى وانتى هتكذبى لية خدى بالك من نفسك ومصر خلاص مش امان
عدد الردود 0
بواسطة:
Tato
حدث من قبل
لى صديق تم قذف سيارته بحجر كسر له الزجاج الامامى على محور م لبنان وذلك لتسبيته والحمد لله موقفش فا ريت ناخد الموضوع بجد للحفاظ على ارواح الشعب
عدد الردود 0
بواسطة:
mahmoud hassan
ليا تعليق بسيط
انا متفق جدا مع التعليق رقم 1 و2 ان القصة من اولها للأخرها فيلم هندي ازاي الكاوتش لما فرقع وخصوصا العجلة الامامية العربية فضلت ماشية من غير ماتتقلب دي لو كانت سايقة مدرعة مش هيحصل كدة دي اول شئ التليفون اللي قفل وفتح تاني دة اشتغل لواحدو ولف عكس الاتجاة ووقف للكمين وكمان اتصلت بية بعد رابع مرة رد وهو كان محجوز في الكمين قالها انا جاي ومعايا الامين والامين قالي متردش علي التليفون والامين اصلا مفروض في الفيلم انة قاعد جنبة يعني من الاخر المخرج معرفش يخرج صح .. جريدة اليوم السابع من اكبر الجرايد الكبيرة لابد التأكد من صحتة لان الكلام دة ميدخلش في دماغ واحد طفل في حضانة فمن رأي خبر ليس لة اساس من الصحة واكيد البنت دي وصاحبتها تبع الاخوان عشان يهزو سمعة مصر ويقولو ان مصر مفهاش الامن والامان ياعيني عليكي يامصر
عدد الردود 0
بواسطة:
مصطفى عراقى
????????????//فيلم هندى
السؤال هنا بقى كنت بتعملى ايه بعد الساعه واحده بالليل على الدائرى