فيسبوك
واتساب
بعد الغلا والجوع ما جانى
للحياه بقا طعم تانى
فجأة لقيت الدنيا ضلمه
أسعار فى نار وناسها ظالمه
والمر زاد من غير ميعاد
لما طمع فينا العباد
ولقتنى قاعد أشكى فى همى
منين وفين وإزاى يا ربى؟
_ _ _ _ _ _ _ _ _
جانى الشيطان ومسك ودانى
قالى كلام شقلب كيانى
بور فى أرضك وبيع مبانى
هتاخد أيه م الأرض تانى؟
بور وسيبك م الزراعه
ضهر البلد هو الصناعه
بورها وابنى كام عماره
دى الفلوس ع الجاه أماره
بورها يللا واملا الجيوب
وبكام جنيه هتجيب حبوب
بور وسيبك م اللى يقول
الأرض عرض أو حتى طول
بور وعيش فـ الدنيا بيه
م الفِلاحه خدت أيه
خدت الشقا وغٌلب السنين
دى الخدمه فيها أخرتها طين
بورها يا عم وبيع مبانى
هتاخد أيه م الأرض تانى؟
_ _ _ _ _ _ _ _ _ _ _
وسوس وكان قاصده لئيم
وسابنى فـ الأخر حزين
أسمع كلامه وأقول أمين؟
وأعشلى فـ الدنيا يومين؟
ولـ أقوم وفـ أرضى أعافر
يمكن يطلعلى فى يوم ضوافر
وأقدر أرد الكيل كيلين
لكل ظالم ماعرفش دين
_ _ _ _ _ _ __ __
ومع أن قالوا الجوع دا كافر
لقيته فـ الأخر ضعيف
لما يبقا دواه رغيف
والرغيف أنا عندى سره
جوه فـ أرضى خيره كله
وأقدر أجيبه وأقول خدوه
للشعب ياكل اصرفوه
بس يا خسارة الحكايه
كان الغلاء ليها نهايه
ولقتنى قاعد جوه أرضى
والسؤال اللى تاعبنى
أجيب منين أزرع يا ربى؟
أجيب منين أزرع يا ربى؟
