90 مليون تجمعهم الضحكة الحلوة .. الرضا والستر أبسط أحلام الشعب المصرى

90 مليون نسمة هو التعداد الأخير الذي رصدته الساعة الإليكترونية لمركز التعبئة والإحصاء عن عدد المواطنين المصريين، وهو التعداد الذى استقبله المصريون بضحكات متنوعة، وردود أفعال متباينة، ما بين الضحك، السخرية، والكوميديا السوداء التي اشتهر بها الشعب المصري، فما بين وجوه ال 90 مليون مصرى تجد كل ما يمكن تخيله من تعبيرات ما بين الحزن والفرح، وتبقى الضحكة الصافية هي العامل المشترك الأول بين الوجوه، وهي الضحكات التى استقبل بها معظمهم سؤال اليوم السابع عن رأيهم في التعداد الأخير للشعب المصري ..
• تعرف ان مصر بقت 90 مليون مواطن ؟

عامر خليفة-سائق تاكسي-47 سنة:

لازم يبقى عندنا بال طويل، صحيح أن الناس تعبانة بس برده لسه فى حاجات كويسة فى البلد، وكل اللى نفسي فيه بعد ما بقينا 90 مليون أن الناس يبقى عندها صبر وتفاؤل شوية.

فايزة عبد العليم -مدير عام فى الإذاعة-52 سنة:

نفسي الشباب يشتغلوا والبطالة تختفي نهائي فى العالم كله، وبالذات فى مصر، وأنا متفائلة بالمدن الجديدة والمشروعات اللى بتتعمل على البلد ومخلياها واقفة على رجلها.

منير محمد أمين-عضو منتدب فى شركة-71 سنة:

نفسي يوسعوا الشوارع شوية عشان الزحمة تخف، أو يعلوا شوارع جديدة، اللى موجودة دلوقتى دى من أيام ما كان فيه 1000 عربية بس فى مصر، دلوقتى بقوا مليون ولسة الشوارع زي ما هى متغيرتش.

محمد السيد حسين-سائق-58سنة:

عندى 3 متخرجين من الجامعة بكالوريوس تجارة نفسي أوى لو يتوظفوا، حاسس أن البلد هتبقى أحسن على وش الرئيس السيسي، وبقول له متنساش الغلابة اللى زينا ياريس.

محمود خيري-عامل فى شركة كاوتش-34سنة:

نفسنا البلد تستقر وعجلة الإنتاج تدور، ويبقى فيه أمان فى البلد عشان نكسب أكل عيشنا بالحلال، والشباب اللى زيى يلاقوا فرصة أنهم يتجوزوا ويعيشوا.

ياسر على محمد- يعمل فى شركة دعاية-45سنة:

أنا مخليها على الله، ونفسي أوى أن حال البلد يتصلح، ويمكن لما نبقى 90 مليون الناس تحس أنها لازم تشتغل وتقدم للبلد أكتر عشان نعرف نعيش.

الحاج فتحى أبو واصل-فلاح-65سنة:

الدنيا بتبقى حلوة طول ما مصر حلوة، نفسي ربنا يصلح أحوال البلد، والبلد لما بتبقى زينى أنا وولادى بنبقى زينيين.

سناء السيد أحمد-ربة منزل-45 سنة:

نفسي ربنا يراضيني ، وأبقى أم لمصري واحد بس من الـ100 مليون ، وأملى كبير فى الطب وبدعى ربنا يستجيب لى مع كلا صلاة، ونفسي كمان الرجال متبقاش كشيريين.

الطفل على محمد محمود-5سنين:

نفسي يبقى عندى عجلة وعربية وأروح الملاهى وأما أكبر أبقى دكتور.

الحاجة رضا جمال- بائعة نعناع-60 سنة:

نفسي البلد ميبقاش فيها ظلم، وأن ابنى ينقلون من سجن المنيا لمصر عشان أعرف أشوفه، لأن صحتى متقدرش على السفر والمشاوير، وأن ربنا يخفف عليه وجع الكلى والمفاصل ويرحمنى من القعدة فى الشارع فى الشتا.

ميار عبد القادر-15 سنة-طالبة إعدادى:

نفسي أدخل ثانوية عامة وأجيب مجموع وأطلع مدرسة ، عشان أكسب فلوس كتير زى المدرسين بتوعى.

تنسيم محمد-طالبة جامعة-21سنة:

نفسي يوقفوا إصدار العربيات ، ويبقى فيه نظام من غير بلطجة، ويعملو باركينج فى كل حتة عشان العربيا متقوفش فى نص الشارع.