60 عاما هو عمر عم رمضان السكرى الذى يلقب نفسه باسم " مصور الغلابة" كما يقول لليوم السابع" من وأنا صغير كنت بحلم أكون مصور وأول ما كبرت شوية اشتغلت مع والدى فى الورشة بتاعته لحد ما عرفت أجيب كاميرا صغيرة، وكنت بصور الناس فى شارعنا من غير فلوس وأحمض ليهم الصور وكانوا بيفرحوا بيها، بعدها بسنتين كان عندى 17 سنة قررت أبقى مصور والناس تعرفنى بس مكنتش عايز يكون ليا مكتب ومكان كنت عايز ألف مصر عشان الناس تعرفنى أكتر ولما أتجوزت رفضت أتخلى عن مهنتى وحلمى وبقيت اتعب أكتر كل يوم عشان أعرف أصرف على بيتى.
يبتسم ابتسامة هادئة قبل أن يستكمل حديثه "كنت فى الأول بصور الصورة بجنيه ودلوقتى بقيت بخمسة بس عشان أنا اسمى مصور الغلابة عشان يبقى اسم على مسمى، هفضل شايل الكاميرا لحد ما أموت وكان كل حلمى أن أشتغل فى مكان مهم وأبقى مصور كبير ومشهور، وساعتها بردوا مش هغلى سعر الصورة وهتبقى بخمسة جنيه لأن التصوير ده زى ولادى بالظبط فى دمى".
