"الشكك ممنوع بالذات للصحاب، اللى عنده دم أحسن من اللى عنده عزبة، الإحساس نعمة".. جمل تضمنتها لوحات معلقة خارج وداخل المحل ليعلن "أشرف" من خلالها عن رفضه التام لكلمة "يبقالك" وكرهه الشديد لجملة "أول الشهر" دون استثناء لأحد، فحتى إن خرج أبوه من قبره لن يسمح له بالشكك أبدًا، على حد تعبيره.
"الشكك كان هيجيب درفها"، هكذا يشرح "أشرف" أسباب قراره الصارم، واصفاً مدى غضبه من استغلال بعض أصدقائه وجيرانه للصلة القوية التى تربطهم ببعض، وأخذ ما يحلو لهم من احتياجاتهم المنزلية وحلوى الأطفال وتأجيل الدفع إلى أجل غير مسمى، مما كاد أن يوقعه فى مشاكل مادية لا حصر لها.
وأضاف: "فتحت المحل ده من حوالى 11 سنة شراكة مع أخويا الأصغر منى، وهو مصدر رزقنا الوحيد، وطبعاً لأن الظروف الاقتصادية فى البلد كلها مش قد كده، بدأ أهل المنطقة فى تأجيل دفع مشترياتهم كل أول شهر، لكن تقريباً أول الشهر ده مكانش بيجى أبداً وحتى لو جه فعلاً وقرروا يدفعوا تبدأ المشاكل والتشكيك فى حساباتى، وده اللى عرضنى لمشاكل مادية كبيرة".
وتابع: "علشان كده قررت أمنع الشكك، علشان أبعد عن الشر وأغنى له، وطبعاً جربت أقول أكتر من مرة لكن للأسف محدش كان بيهتم، فعلقت أول لوحة مأثرتش، علقت التانية عملوا نفسهم مش شايفين، فقررت أعلق فى كل أركان المحل لغاية ما قضيت على الشكك وقريت عليه الفاتحة".
