دستور منظور
وطيور الصمت بتبدر خوف
وبتشهد زور
ووحوش السكه
بتنهش بطن الأرض البور
وماتور بيدور على حلم ماتور
والشمس بتحبل أنتريهات
وبتطرح فتّه وتوت وبخور
والوطن الواقف بين الباب وكلاب السور
وطنى المحصور
دستور منظور
ارفضنى بيان فى ميدان الله
وارسمنى بابور
واوهبنى نذور وسط الدراويش
دستور وبلدنا بتتاوب وسط الخفافيش
دستور والبنت الحبّيبه بتفتح لى الشيش
دستور والعالم متمدد على طاولة عيش
دستور حرافيش
وياميش رمضان مش مدّستر
وحديد الجيش مش متبسطر على قهوة ريش
دستور، حنطور، نسوان وحشيش
والقلب نافوره وخيمه وخيش
وفوارغ من عِبّ الخراطيس فى قلوب الناس
موهوب علشانك مدنه وفاس
موهوب إحساس ووطن ومداس
موهوب لكلابك لحمة راس
موهوب فلايه وتشط نحاس
موهوب قرطاس
كراس فى إيدين حراس البيه
دستور بالشطه ف قُرْص باتيه
دستور واطلع سلم لى عليه
دستور منظور وأنا باصص فيه
وهينزل بالسم الهارى
دستور من مصر لكالهارى
دستور والنيل عمال يضحك
دستور والنيل نصه كبارى
دستور والجن ما هوش طالع
دستور لشوارع وحوارى
دستور وبرارى الأرض ربيع
والناس محشى وكفته وبلابيع
دستور والدوله بتتاوب
دستورك والجدع اللى يبيع
دستور يا شيطان تحت التصنيع
دستور والعالم بيطبّع
دستور وسيادته هيتربع
دستور وبروتوكول للتطبيع
دستور م المنشأ للمنبع
دستووووووووووووووور
واتسكّ على المواضيع
.........-
............-
- دستور
- دستور
تسمح لى نذيع
