سألت أحد شيوخنا الكبار عن موقف الشرع من زواج السلطة بالمال والمال بالسلطة قأجابنى:
الشيخ: بُص ياسيدى
هذا الزواج أصلاً 00 لا يحوز شرعاً
( وعندما سألته لماذا 00 رد عليا وقال 0000 )
أولاً: لأنه زواج تم فى السر وبدون إشهار
ثانياً وده الأهم: أنه تم بدون موافقة ولى الأمر
(يقصد الشعب)
فرديت وسألته: طب وأيه دلوقتى موقف الطفل اللى خلفوه؟
(فالراجل رجع بضهره شوية لورا 00 ورد عليا بكل ثقة وقال 000 )
الشيخ: تقصد الفساد
من الناحية دى اطمن خالص
أبو الطفل وأمه حلولنا المشكلة دى من جذورها
رديت: إزاى فضيلتك؟
الشيخ: هما حطوه كوديعة فى أحد البنوك السويسرية لحين الفصل فى الأمر!!
والسؤال التانى وجهته لأحد المخرجين الكبار فى إحدى القنوات الإخبارية الشهيرة
اللى مشهورة بسرعة إذاعة الخبر وردود أفعال المسئولين
والسؤال كان: إزاى بتلحقوا تذيعوا الخبر وردود أفعال المسئولين بالسرعة دى قبل أى قناة إخبارية؟
منافسة ليكو؟
رد المخرج وقال: بُص ياسيدى 00
أنا هاقولك ع السر 00 بس أوعدنى أن أنت ماتنشرهوش
عشان ده سر الصنعة
(وعدته 00 ثم قال 000)
المخرج: إحنا عندنا هنا فى المحطة شرايط كتيرة قوى لردود أفعال مسئولين كبار 00 عرب ومصريين
فى قضايا ومشاكل مختلفة ذعناها قبل كده
فمثلاً: حدث زى غزو العراق 00 أو اجتياح غزة أو أى حدث شبيه
نذيع كل العبارات الإدانة والشجب اللى قالوها كل المسئولين العرب فى المناسبات المشابهة
قبل كده 00 قبل ما المسئولين نفسهم ما يسمعوا بالخبر
المهم عشان ماننكشفش00
إنه يكون المسئول على قيد الحياة ومامتش
وربنا يدينا ويديلك طولة العمر!!
ورُحت عملت ربورتاج صحفى مع مواطن سكندرى بلدياتى 00 وخادته وقعدنا تحت تمثال سعد زغلول
والمواطن ده من مهاويس مسابقات التليفون اللى بتيجى فى التليفزيون
وأخيراً وبعد سنين طويلة وعناء 00 كسب فى أحد البرامج 100 جنيه مصرى
وراح استلمهم من مقر القناة فى مدينة الإنتاج الإعلامى بمحافظة 6 أكتوبر
سألته وهو ماسك الـ 100 جنيه ومش مصدق: قوللى شعورك أيه بعد ماتحقق أملك أخيراً وفوزت بجايزة
من برامج المسابقات فى التليفزيون؟
المواطن: فرحان 00 فرحان قوى
سألته: ياترى السؤال اللى جاوبت عليه كان أيه؟
المواطن: هو السؤال كان صعب شوية 00 بس أنا الحمد لله 00 جاوبت عليه
السؤال ياسيدى كان بيقول 00
ياترى كورنيش إسكندرية 00 بيطل ع البحر واللاّ ع النيل؟
فرديت عليه بقرف وقولت له: آه 00
الحقيقى السؤال كان صعب فعلاً
المهم قوللى 00
صرفت قد أيه عشان تفوز بـ الـ 100 جنيه دى؟
المواطن: الحقيقة أنا كنت بتصل كل يوم 5 مرات 00 والمكالمة الواحدة كانت بتكلفنى جنيه ونص
وبقالى 3 شهور متواصلة بتصل بالبرنامج ده
يعنى نحسبها بالبلدى كده
أنا كنت بتصل فى الشهر 150 مرة
يعنى فى الـ 3 شهور 450 مرة
نضربهم فى جنيه ونص
يبقى الحساب: 675 جنيهًا
حط عليهم ياسيدى حساب تذكرة القطر الأسبانى درجة أولى ذهاباً وأياباً 110 جنيهات و100 جنيه كمان أجرة التاكسى اللى وصلنى لمكان الإستديو اللى هاستلم فيه جايزتى
واستنانى عشان رجعنى رمسيس تانى
يبقى الحساب كله : 885 جنيها
و5 جنيهات كمان التاكسى اللى جابنى لحضرتك هنا
يبقى المجموع : 890 جنيه مقفولين
( ولقيت وشى احمر من الغيظ 00 وقبل مارد عليه 00 لقيت تمثال سعد زغلول بيتهز 00 ومال برأسه ناحيتنا وبص لى وقال 0000 )
مفيش فايدة !!
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة