سارة صلاح تكتب: ليه بنحب كايروكى؟.. حكاية جيل لقى نفسه فى أغانيهم وكبر معاهم

خدت وقت طويل مش عارفة أبدأ الكلام إزاي، ومش عارفة أصلًا أكتب عن كايروكى كصحفية، ولا المرة دى لازم أكتب كواحدة من جمهورهم.

لأن الحقيقة إن كايروكى بالنسبة لي عمرها ما كانت مجرد فرقة بسمع أغانيها كايروكي جزء من حكاية كبيرة في حياتي، وفى حياة كل جمهورهم و محبيهم، من سنة 2011، وأنا بسمعهم وقت ما كانت الأغنية بالنسبة لي أكتر من مجرد أغنية، ووقت ما كان فيه إحساس إن الموسيقى ممكن فعلًا يكون ليها صوت وتأثير ومعنى.

وده فى رأيى أعظم شيء ممكن يحققه فنان إنه مايبقاش مجرد صوت بنسمعه يبقى جزء من ذاكرتنا و عمرنا و نكبر معاهم، ومن وقتها بدأت الحكاية كبرت وأنا بسمع كايروكي في فرق بتسمعها وفي فرق بتعيش معاها وكايروكي بالنسبة لي من النوع التاني.

من أول مرة سمعت فيها أغانيهم، كان دائما عندي إحساس إنهم مش بيغنوا عن حياتهم هما بس، لكن بطريقة ما كانوا بيحكوا عننا إحنا كمان عن حاجات معرفناش نقولها عن أحلام كبرت معانا، عن خيبات، عن حب، عن خوف، وعن لحظات حسينا فيها إننا لوحدنا، فنلاقي أغنية بتقول بالنيابة عننا كل اللي عجزنا نقوله.

وعشان كده، لما طرحوا ألبوم "سوبر نوڤا" ماحسيتش إني قدام ألبوم جديد لفرقة بحبها وخلاص حسيت إني قدام فصل جديد من حكاية طويلة جدا، أربع سنين مروا  على ألبوم «روما»، وأربع سنين كفاية إن ناس كتير تتغير، تكبر، تحب، تخسر، تبدأ من جديد، وتكتشف نفسها أكتر ويمكن ده بالضبط اللي بيخلي استقبال ألبوم جديد من كايروكي مختلف  إحنا مش بنسمع الأغاني بنفس الأشخاص اللي كنا عليها من أربع سنين.

فرقة عرفت من البداية إنها مش محتاجة تشبه حد، ومع الوقت قدرت تعمل لنفسها مكان خاص جدًا في الموسيقى وفي قلوب جمهورها والأجمل إنها كبرت مع جمهورها، من غير ما تفقد الروح اللي خلت الناس تحبها من البداية.

أمير عيد، وتامر هاشم و هوارى و آدم و شريف، كايروكي بالنسبة لي مش مجرد أسماء على ألبوم هم جزء من ذكرياتى و ذكريات جمهور كبير كلمات سمعناها وإحنا في عز فرحتنا و في أسوأ أيامنا وجملة من أغنية فضلت عالقة في دماغنا لأننا حسينا إنها اتكتبت مخصوص لينا، وده يمكن سر كايروكي الحقيقي إنهم قدروا يعملوا موسيقى فيها شيء شخصي جدًا، وفي نفس الوقت كل واحد يقدر يشوف نفسه فيها ألبوم "سوبر نوڤا" بالنسبة لي ليس محاولة لإثبات إن كايروكي لسه موجوده لأنهم عمرهم ما اختفوا من الأساس هو أشبه برسالة بتقول: "إحنا اتغيرنا.. وإنتوا كمان اتغيرتوا.. تعالوا نكمل الحكاية سوا ".

والمؤكد بالنسبة لي إن كايروكي قدرت تعمل حاجة نادرة جدًا إنها تخلي أجيال كاملة تحس إن عندها صوت، صوت بيغني عن الحب لما يكون صعب، وعن الوحدة لما تكون تقيلة، وعن الأحلام لما تبقى أكبر من قدرتنا، وعن الحياة بكل تناقضاتها وعشان كده، وأنا بسمع "سوبر نوڤا"، ماكنتش بسمع ألبوم جديد وبس كنت بسمع جزءًا من عمرى وبفتكر قد إيه الموسيقى ممكن تكون أكتر من مجرد أغنية وممكن تكون شاهد على حياتنا.

ويمكن دى أجمل حاجة قدمتها كايروكي لجمهورها طوال السنين إنها لم تكن بس فرقة بنسمعها  ولكن فرقة بنكبر معاها و بتعبر عننا طول السنين ومستمرة.