نبيلة عبيد: وافقت على فيلم توت توت رغم إن المؤلف قالى دورك فيه 15 كلمة فقط

تحدثت النجمة الكبيرة نبيلة عبيد عن بعض محطاتها السينمائية، وبعض الكواليس التي مرت بها، وبسؤالها عن ذكرياتها مع فيلم «توت توت»، والتى قدمت من خلاله دور فتاة تعانى من تراجع عقلى، فيتم اغتصابها حتى تحمل وتصبح أماً، دون أن يكون لديها القدرة على ذلك لكونها من ذوى القدرات الخاصة.

وقالت النجمة نبيلة عبيد فى مداخلة هاتفية لتليفزيون اليوم السابع: "جالى المؤلف عصام الشماع الله يرحمه وقالى فيه رواية اسمها توت توت بس كل الحوار بتاعك فى الفيلم هيكون حوالى 15 كلمة فأنا بصيتله كدة قالى أيوة عشان الشخصية كذا وكذا وكذا.. ده كان عصام الشماع الله يرحمه، فبصيتله كدة وقولتله تمام أوك.. فبصلى كدة قالى موافقة؟.. قولتله طبعا".

وأضافت نبيلة عبيد لتليفزيون اليوم السابع قائلة: "فنزل عصام الشماع راح عند مكتب المنتج إبراهيم شوقى فقالى أنت وافقتى قولتله أيوة، فاستغرب جدا". وتابعت النجمة نبيلة عبيد حديثها قائلة: "وبعدين أنا اخترت المخرج عاطف سالم يعمل الموضوع ده، لإن أنا بمعاشرتى لـ عاطف سالم كزوج في البدايات.. عاطف بيعشق الأطفال الصغيرة.. فهى البنت دى شخصيتى في الفيلم، شكلها الجسمانى كبير لكن عقلها عقل أطفال.. فأنا قولتله عاطف سالم اللى يعمل الشغل ده".

وعن رد فعل المخرج عاطف سالم، قالت النجمة نبيلة عبيد: "عاطف سالم انبسط جدا لما راحله الموضوع ده فرح بيه وكلمنى.. وأنا وقتها كنت انفصلت عن عاطف سالم من مدة ولم التقِ بيه.. أنا دايما بفصل بين الشغل والعلاقات الإنسانية، وده كمخرج كان بيشغلنى زى الأطفال الصغيرة في الفيلم لإنه يعلم تماما بتفاصيل الموضوع، فهو كان بيوجهنى.. وأنا وافقت بالفيلم على طول لإنى أنا حبيت الشخصية، وكنت بروح الجمعيات اللى فيها شخصيات زى كدة، وأبص عليهم لحد ما دخلت الشخصية داخليا فيا واتعمقت معاها".