نبيلة عبيد: لما بوست نادية الجندى واتصافينا يحيى الفخرانى قالى دى المصالحة الوطنية

كشفت النجمة الكبيرة نبيلة عبيد عن كواليس مهمة في مشوارها الفنى، خاصة التي تتعلق بعلاقتها مع زميلتها النجمة الكبيرة نادية الجندى، حيث حكت عن موقف جمعهما فى أحد المهرجانات الكبرى بحضور النجم الكبير يحيى الفخرانى.

وقالت عبيد في مداخلة هاتفية لتليفزيون اليوم السابع: " كان فيه مرة حفل توزيع جوائز بمهرجان ما كبير، وكنت حاضرة أنا ونادية الجندى، ودخلت هى قبل منى وكان موجود يحيى الفخرانى وكان فيه ممثلين تانيين".

وأضافت عبيد لتليفزيون اليوم السابع قائلة: "فأنا قولت لنادية هبوسك قدام الناس، عشان ماتتخضش على المسرح فقالتلى أه أه.. فهى دخلت حيت الجمهور وأنا دخلت حييت الجمهور وأدورت كدة، راحت جاية فى حضنى، وبعدين يحيى الفخرانى وقتها ضحك وقال دى المصالحة الوطنية... وبعدين نادوا على اسمها ونادوا على اسمى.. وبعدين البوسة دى خلت الناس كلها تشهد وتعرف إن مفيش في قلبى حاجة ولا فى يوم كان فيه حاجة بينا".

نبيلة عبيد: نقل الكلام كان سبب خلافى مع نادية الجندى وقعدت سنين مش فاهمة حاجة

قالت النجمة الكبيرة نبيلة عبيد فى مداخلة هاتفية لتليفزيون اليوم السابع: "مفيش غيرة بينى وبين نادية الجندى.. غيرة ليه؟!.. اللون اللى نادية بتقدمه أنا مابقدموش.. أنا عندى لون وسكة وهى عندها لون وسكة فهيكون فيه غيرة ليه؟".

وأضافت عبيد لتليفزيون اليوم السابع: "سبب المشاكل خلال فترة ما، هقولك ده من تدخل بعض الأشخاص في نقل كلام غلط مش مظبوط بيقولولها هى كلام مش حقيقى.. أنا قعدت 3 سنين مش عارفة هى المشكلة إيه؟!.. لحد ما مرة قاعدة معايا صحفية اسمها عائشة صالح مش عارفة موجودة دلوقتى ولا لأ كانت في المصور.. طرحت عليا السؤال ده.. وقالت لى حصل وحصل قولتلها ليه؟؟ قولتلها أنا ماعنديش أى فكرة".

وتابعت عبيد خلال حديثها لتليفزيون اليوم السابع قائلة: " فبدأت أتتبع بقى.. اللى بيجولى ويتكلموا ويعملوا معايا موضوعات أو كدة.. ياخدوا كلام ويوصلوه بشكل خاطئ .. لمدة 3 سنين أنا ماكنتش مشغولة غير بشغلى ومشغولة بتحضيراتى والحاجات دى كلها.. ومرة سألتنى السؤال ده وبطريقة بقى عايزة تاخد منى سبق صحفى.. قولتلها أنا ما أعرفش حاجة خالص.. قالتلى إزاى ده مالى الجرايد.. قولتلها لا لا مفيش خالص.. أنا من ناحيتى ماعنديش.. بس يجوز الناس اللى بيتكلموا معاها هما اللى بيحرفوا الكلام وهما اللى قاصدين يعملوا كدة.. بالنسبة لـ نادية أو أى حد تانى.. ماعنديش غير ثقتى فى ربنا وشغلى والناس اللى بتعامل معاهم".