نادية الجندى: وقعت من طولى عند سماع خبر وفاة هانى شاكر (فيديو)

أوضحت النجمة الكبيرة نادية الجندى، مدى حزنها وصدمتها بخبر وفاة النجم الكبير هانى شاكر، رغم علمها التام بحالته المرضية المتأخرة والأمل المنعدم في شفائه، حيث قالت خلال مداخلة هاتفية لتليفزيون اليوم السابع: "أنا مهما أقول عنه مش هوفيه حقه.. وبعدين العذاب اللى تحمله في الرحلة الأخيرة في مرضه، يارب يشفعله ويدخله الجنة بإذن الله تعالى.. أنا مهما أقول حزنى عليه مش هعرب أعبر عن مدى حالتى".

وأضافت نادية الجندى لتليفزيون اليوم السابع قائلة: "بالرغم من إنى عارفة إن حالته كانت ميئوس منها، وكنت على طول متتبعة حالته كل يوم بيحصل فيها إيه، وإنه في حالة حرجة جدا مش هيقوم منها.. وبالرغم من كدة أول ماقالوا لى توفى وقعت من طولى رغم إنى كنت عارفة حالته لكن برضه ما أقدرش اتحمل الصدمة".

وتابعت نادية الجندى خلال حديثها قائلة: "شوف حب الناس في مصر ليه والعالم العربى.. الناس النهاردة اللى يعرفوه وما يعرفهوش في حالة حزن عليه.. فده يثبتلك إن الفنان المحترم الحقيقى بيكون إحساس الجمهور بيه إيه.. وربنا يصبر مراته وقفت معاه وقفة عظيمة ربنا يصبرها".

ماذا قالت نادية الجندى عن هانى شاكر؟

وقالت النجمة نادية الجندى: "البقاء لله.. أنا مش هتكلم عن فن هانى شاكر.. هانى شاكر الفنان غنى عن التعريف.. تاريخه حافل بالأعمال الجميلة الهادفة الممتعة الراقية اللى بتمس وجدان الناس.. لكن أنا هتكلم عن هانى شاكر الإنسان لإن أنا عاشرته 25 سنة.. لإنه جارى.. كانت علاقتى بيه علاقة مقربة جدا.. عرفته بقى كإنسان في كل مواقفه.. في صراعاته.. وموت بنته.. الصدمة اللى أتصدمها.. كل مواقف حياته أنا حضرتها معاه".

وأضافت الجندى قائلة: "هانى مر بظروف كتير قاسية جدا.. وكان حمول بيتحمل كتير جدا.. وإنسان رقيق وعطوف وودود وما غلطش في حد.. يعنى فعلا نعمة الجيرة الجميلة.. عشرته كانت عشرة جميلة".