حسن الرداد: لولا أحمد السبكى كنا هنشوف سنوات عِجاف فى صناعة السينما

الأحد، 24 مايو 2026 10:00 م

تغطية تليفزيون اليوم السابع

حاوره عمرو صحصاح

أكد النجم حسن الرداد أن سر التعاون المستمر منذ سنوات طويلة مع المنتج أحمد السبكى، هو إحترامه الكامل له على المستوى الفنى والإنسانى، حيث تربطهما علاقة إنسانية وعائلية بحسب وصفه.

وقال الرداد فى مداخلة هاتفية لتليفزيون اليوم السابع: "الحاج أحمد السبكى علاقتنا الإنسانية كبيرة جدا، وهى علاقة عائلية بكل أسرته وولاده إخواتى كريم ومحمد وخالد.. ووالدتى الله يرحمها كانت صديقة لزوجة الحاج أحمد السبكى فهناك علاقة عائلية كبيرة".

حسن الرداد: أحمد السبكى اشتغل مع كل الأجيال منهم نور الشريف وأحمد زكى ونادية الجندى

وأضاف الرداد قائلا: "ثانيا على المستوى المهنى فهو منتج كبير اشتغل مع كبار كبار نجوم السينما أستاذ نور الشريف وأستاذ أحمد زكى وأستاذ محمود حميدة ومدام نادية الجندى وأستاذة إلهام شاهين.. واشتغل مع الأجيال اللى بعد كدة.. فعنده مكتبة كبيرة مرعبة ورجل بيحب وبيعشق السينما".

وتابع الرداد حديثه قائلا: "فى وقت الثورة كنت هتلاقى في الفترة دى سنين عجاف في السينما المصرية، فهو أنتج وشَغل الصُناع وشغل السينمات.. شغل كل اللى الناس اللى شغالة في الصناعة فهو في النهاية رجل محب وعاشق للسينما وبيشتغل للسينما مش الهدف الأساسى الربح.. أكيد كلنا عايزين نكسب فهو هدفه إنه عايز يعمل فن..ويعمل أفلام كتيرة.. تلاقيه داخل يعمل أفلام بتروح مهرجانات ما بتكسبش بس هو عايز يعمل تنوع.. عشان كدة أنا بحب المنتج الفنان الى بيحب السينما والإنتاج الحقيقى".