زيارة .. قصيدة لـ محمد حامد فى ملتقى بيت الشعر العربى للنص الجديد

يستعد بيت الشعر العربي، بإدارة الشاعر سامح محجوب، لإطلاق الدورة الثانية من "ملتقى بيت الشعر العربي للنص الجديد"، وذلك خلال يومي 2 و3 مايو، في إطار استكمال التجربة التي حققت حضورًا لافتًا في المشهد الثقافي خلال دورتها الأولى.

محمد حامد وملتقى بيت الشعر العربي

وننشر القصائد المشاركة في الملتقى:
زيارة .. لـ محمود حامد

نِفسَك تشوف النور؟
تعرف؟!
ورا البوابة..
بوابة
ومستني عليها حصان
هياخدك للنسيم وتطير..
شعاع ..
تخبط عمود السقف..
يسقط..
للتراب
وتحِش قَش الكلمه وتخش المعاني
السما..
بحر اللي بيعاني
وإن غاب علينا اليوم بنحلم
بكره هانصيف جميعا
بس نسعى

وجريت على الشط البعيد
وشاورت للفايتين
أوصل؟
ما بوصلشي
ونزلت للترعة
وطلِعْت ما طِلْعِت على التُوْتَة
و أكلت حدوتة جدود وجريت
وقَطَعت انفاس الكلاب م الجري
أوصل؟
ما بوصلش
نطيت على سطوح الجيران
و الروح حنان
رنيت جرس ...
(ألقاش في احضانكم دفى؟)،
ولا كلمة راضية تفوت...
مين؟
وكإني باسأل نفسي عن نفسي
مين؟
لِسَّاني..
لِسَّاني
مين؟
ولا بامشي..
ولا بانطق
مين؟
الكلمه بتطقطق.. وقلقاني
مين؟
قرَّب عليَّا الصوت ..
على الاوكرة ..
على لساني
قَبْض الكسوف على قلبي جَرَّاني
رنيت جرس تاني
وعشان أعدي من الكلام للحضن ..
هاتخونِّي الدموع
واخسر في عيني الشوف
قَلِّبني على نارُه الكسوف..
فنزلت
رنيت جرس ومازلت
م العتبة للعتبة..
حِفِيت
وفحضن آخر سِلِّمة ..
هَدِّيت
رنيت جرس..
رن الفراغ...
فجريت
فوتني بيت ورا بيت
فايت على القلب الحنان..
نطيت
أوصل؟
ما باوصلشي
وجريت على الشط البعيد
وشاورت للفايتين ...
خدوني
(الدنيا ازحم على المراكب
والسفر نساي وقادر يقتلك
من غير رصاص ولا سيف
الدنيا ازحم...
م الخريف..
إهرب)
جريت ،
وكبرت ...
نفس الحال
سؤال :
(هاوصل؟)

ومشيت على حبل احتمال

البرد ...
قطَّع كل شريان للشوارع
وبصريخ الريح..
بينزف خطوة الناس في البيوت
وانا بيتي في الشارع
فبانزف كل شريان اتقطع مني
كإني بكتب الغنوة
كإني بكتب العمر اللي جاي بخطوتي،
وجراحي في الزمن البليد

وبخطوتي ..
حَل الصريخ
هزيت جذوع الشمس سقَّطت التاريخ
في المداين كل ساحر
بَدِّل القلب بجيوب
فإحدف عصاك
يمكن تتوب الناس
وتملاهم...
قلوب

كل التعب..
والشمس اصفر م اللمونه
في الغروب الغيم بيجمع كل نور الشمس ..
ويخبيه في جيبه
كل العيال جريت مع المرواح
ما اعرفش كارهين في الشتا وقت الغروب
ولا الغروب بيزقهم على البيت بخرزانته
لكن ...
انا اتاخرت
جارر ورايا شنطه..
مليانه..
بكلام فاضي
من إجابات الوزاره
والموت..
لأسألة البراءه
كل التعب..
امي
وابويا طفى الشمس لعيون السفر
وانا في السؤال
بس الغروب
وبسخريه
قالي ابقى اسأل
لو دكر

كُنت أمّا أخاف الليل
مع النداهة والسلعوة
أطلع على الترعة
و أتغنَّى بعيون الوَنَس
وأكبَّر القمر اللي واخد ركن في الترعة بحَدْف الطوب
ألقى الشجر بيوِدِّني بصوتُه
بس الرياح بتشُكِّني في الطَّل
ألقى الغراب بيدلِّني..
على جوة سور المَشْتَل..
المقفول
فأرجع بحزني قتيل على كتافي

نفسك تشوف النور؟

على كل سكة الانتظار مستني أصحابه
خوف سجنهم..
بابُه
والموت غريزة بتملكك بالخوف
والخوف مع الأموات..
مريح
عَصَفِت بقلبي الريح
عَمَّال أفور..
وأزيح
وأفوت لطاقة نور
مغرم بتحنيط الشعور في الأغنية
ولا أغنية بتجذ عطش الريق
مع إن انا..
أوضح من الناس ع الطريق
ومطفِّي لمعة جهلي من نار الخطيئة
لا لسان أكلني..
ولا اتفتن شوفي بطريقة
أنا آخري جابني
وسابني للشارع يعض في خطوتي
أوقات باتوة
لا الهم فاكك خطوتي..
ولا خطوتي بتفك خط الهم فاقدر اكتبه..
ويموت
والقلب بين نبضه ونبضه بيعترف بالموت
مع إنه شلال الحياة الجارف..
ورا البوابة
تفتكر هانفوت؟