وائل جسار: نجاح أولادى أكتر حاجة بتفرحنى.. ومصر ليها طعم غير

كشف وائل جسار عن العديد من الجوانب الشخصية والإنسانية في حياته، في تصريحات خاصة لبرنامج "أكتر حاجة" الذي تقدمه خلود نادر على إذاعات راديو النيل، وقال جسار إن أكتر حاجة بتفرحه هي نجاح أولاده، وأكتر حاجة بيحمد ربنا عليها هي الصحة، مشيرًا إلى أن أكتر عادة يتمنى أن يبطلها هي اعتياده على قلة النوم، بينما أكثر ما يضايقه في التعامل هو "الكدب".

وأضاف وائل جسار أن أكتر قرار أخده ومبسوط به هو تأسيس عيلة، وأن أكتر صفة يحبها في نفسه هي الالتزام، مؤكدًا أن أكتر موقف غيّر حياته هو الزواج، حيث أنه أوضح أن أكتر حاجة اشتغل عليها عشان يوصل للمكانة اللي هو فيها دلوقتي هي حب الناس وحسن الاختيار، لافتًا إلى أن أكتر دعاء قريب لقلبه هو دعاء الوالدين.

وعن طقوسه في شهر رمضان، قال وائل جسار، إن أكتر عادة رمضانية بيحبها هي لمة الحبايب والمقربين، وأكتر حاجة مفتقدها في رمضان السنة دي إنه يطلع على منطقة الجبل ويعيش الجو الرمضاني 100% وأشار إلى أن أكتر فيلم أثر فيه هو فيلم "تيتانيك"، وأكتر أغنية بتسلطنه هي "قلبك حنين يا نبي"، بينما أكتر أغنية يحبها له هي "خليني ذكرى". كما أكد أن أكتر أكلة يحبها هي البصلية "لحمة وبصل".

واختتم تصريحاته مؤكدًا أن أكتر حاجة بيخاف منها هي المرض، وأنه يحب الدول العربية كلها لكن مصر لها طعم غير، مشددًا على أن القعدة مع ولاده ومراته هي أكتر حاجة بتونسه.