فيسبوك
واتساب
نيبو وأرض الفراعنة سر تقديس المصريين القدماء للقطط
يمشى منصور وكرم خلف الظل الغامض الذى لمحوه من بعيد.
كرم مندهشًا:
أنا شفت الظل هناك أهو!
منصور مبتسمًا:
فعلا.. رايح ناحية قاعات المتحف المصرى الكبير.
تعالى نشوف هيودّينا فين.
كرم:
يا ترى إيه؟
منصور:
هتعرف دلوقتى.
يتوقفان أمام ركن شبه مظلم من القاعة، وفجأة تظهر باستت… قطة سوداء، تشير بأنفها وتمشى بخطوات رشيقة نحو الداخل.
كرم مندهشًا:
دى قطة!
منصور:
مش قلتلك المرة اللى فاتت؟ دى باستت.
كرم مرتبكًا:
مش فاهم.. باستت ده حيوان ولا إيه؟
منصور بصوت ملىء بالغموض:
يا ترى إيه هى باستت؟
يتقدمان نحو قاعة تضم مومياء قطة محفوظة داخل فاترين عرض.
منصور يبدأ الحكاية:
القطط عند المصريين القدماء ماكانتش مجرد حيوانات أليفة، دى كانت رمزًا للمرح والحماية والموسيقى والرقص.
كرم باهتمام:
كمل يا عمو.
منصور:
كانت باستت معبودة الخصوبة، حامية النساء الحوامل والأطفال الرضع، وابنة لمعبود الشمس رع، وزوجة المعبود بتاح، ووالدة معبود الحرب ماحس.
كانت تُصوَّر أحيانًا برأس أنثى الأسد للدلالة على الشراسة، وأحيانًا برأس قطة للدلالة على الوداعة والحنان.
تعرف كمان يا كرم؟
كرم:
أعرف إيه؟
منصور ضاحكًا:
القطط السوداء كان لها مكانة خاصة جدًا عند المصريين القدماء.
كانوا يعتبرونها رمزًا للحظ والقوة والحماية.
كرم مندهشًا:
يعنى القطط كانت مهمة أوى عندهم؟
منصور:
مش بس مهمة.. دول كان عندهم ولع حقيقى بالقطط.
كرم:
إزاى يعنى؟
منصور:
شوف المعابد والمقابر، مليانة صور وتماثيل للقطط، وكانوا بيحنّطوا القطط ويدفنوها فى مقابر خاصة.
أقولك مفاجأة كمان؟
كرم:
قول يا عمو.
منصور:
أحيانًا لما كانت القطة تموت، كان بعضهم يحلقون حواجبهم حدادًا عليها!
كرم بدهشة:
ده حقيقى؟ كانوا بيحترموها للدرجة دى؟
منصور:
بالضبط، خاصة القطط السوداء زى باستت هنا، كانت مقدسة ومرتبطة بالمعبودة باستت نفسها،
ورمزًا للأمان داخل البيت، خصوصًا للأطفال.
كرم مبتسمًا:
حكاية حلوة أوى يا عمو.
هو أنا ممكن أسميه نيمو؟
منصور ضاحكًا:
ينفع طبعًا.
كرم:
شكرًا يا عمو.
يبدأ كرم فى متابعة القطة، ويشعر وكأنها تقودهما نحو شىء جديد.
منصور:
نيمو عايز يقولنا على سر تانى.
كرم:
هو نيمو رايح فين؟
ترفع القطة ذيلها، وتدخل القاعة المجاورة بخفة، كأنها تعرف الطريق تمامًا.
منصور بصوت مشوق:
أنا عرفت هو رايح فين، يبدو إن فى أمر مهم مرتبط بمكانة الكلمة والمعرفة فى مصر القديمة.
شوف يا كرم..
القط وقف قدام تمثال غريب.
كرم:
إيه هو؟
منصور مبتسمًا:
ده سر.
هقولك عليه الحلقة الجاية.
منصور وكرم ونيبو
نيبو وأرض الفراعنة
