فيسبوك
واتساب
سر الكاتب الذى لا يغمض عينيه
وقفت نيبو فجأة أمام تمثال جالس فى هدوء.
عيناه مفتوحتان، تحدقان وكأنهما تريان كل شىء.
كرم، هامسًا:
هو… هو التمثال ده باصص علينا؟
اقتربت نيبو أكثر، ورفعت مخلبها الصغير نحو حجر التمثال.
منصور بابتسامة غامضة:
واضح إن نيبو اختارت لنا قطعة مهمة جدًا النهارده.
كرم:
مين ده يا عمو؟ وليه قاعد كده؟
منصور:
ده مش ملك،
ولا محارب،
ده الكاتب مترى.
كرم:
كاتب؟ يعنى بيكتب بس؟
منصور يضحك:
«بس» دى كلمة صغيرة قوى يا كرم.
فى مصر القديمة، الكاتب كان من أهم الناس فى البلد.
جلست نيبو بجوار التمثال وكأنها تحرسه.
منصور:
الكتابة زمان ما كانتش حاجة عادية، كانت سر القوة.
اللى يعرف يكتب.. يعرف يحكم.
كرم متعجبًا:
ليه الكاتب كان مهم فى مصر القديمة؟
منصور:
هو اللى كان بيسجل أوامر الملك، وبيوثّق الضرائب والتجارة، وبيكتب النصوص الدينية زى «كتاب الموتى»، وهو اللى حفظ تاريخ مصر كله.
كرم:
يعنى لو مفيش كاتب.. مفيش تاريخ؟
منصور:
بالضبط كده.
قفزت نيبو بخفة أمام التمثال.
كرم:
هو ليه عينيه شكلهم حقيقى كده؟
منصور:
علشان الفنان حط جوه العين بلور صخرى وكوارتز، علشان تبان كأنها حية.
كرم:
كوارتز؟
منصور مبتسمًا:
المصريون القدماء استخدموا الكوارتز، المعروف بصلابته وألوانه الأبيض والأصفر والأحمر،
منذ عصر ما قبل الأسرات، فى صناعة التمائم والخرز والأوانى الصغيرة، وكمان فى تطعيم عيون التماثيل.
كرم:
آه.. فهمت.
كمل يا عمو حكاية التمثال.
منصور:
تمثال الكاتب مترى مصنوع من الخشب، ومن عصر الأسرة الخامسة، واكتُشف فى سقارة سنة 1925.
زى ما قلتلك، اسمه مترى، وكان ليه ألقاب كبيرة جدًا.
كرم:
زى إيه يا عمو؟
منصور:
المشرف على الكتبة، كاهن المعبودة ماعت، والمستشار المقرب.
كرم مندهشًا:
يعنى كان شخصية مهمة أوى!
منصور:
مكانة الكاتب كانت عالية جدًا، لأنه كان عقل الدولة.
فجأة توقفت نيبو وحدّقت بعيدًا، ثم نظرت نحو قاعة أخرى.
كرم:
هى نيبو مش مركزة معانا.
بدأت نيبو تمشى ببطء، لكن مش ناحية تمثال تانى، ناحية شىء أقدم، أقدم بكتير.
منصور بصوت منخفض ملىء بالغموض:
واضح إن نيبو النهارده مش بتدور على كتابة،هى بتدور على بداية الإنسان نفسه.
كرم:
يعنى إيه؟
توقفت نيبو أمام قطعة صغيرة، حجر قديم جدًا، أقدم من المصريين القدماء، أقدم من الكتابة،
أقدم من كل اللى شفناه.
منصور همس:
القطعة دى عمرها.. 700 ألف سنة.
كرم بذهول:
700 ألف سنة؟!
طيب إحكيلى يا عمو.
منصور مبتسمًا:
المرة اللى جاية…
وهقولك سرها الخطير.
رفعت نيبو رأسها، وحدّقت فى الحجر بصمت عميق.
منصور وكرم ونيبو
نيبو وأرض الفراعنة
