خطفت الأنظار في الست.. الطفلة ناديا: سعدت بتجسيد أم كلثوم واستمتعت بالكواليس

السبت، 14 فبراير 2026 08:00 م

الطفلة ناديا : سعدت بتجسيد أم كلثوم واستمتعت بالكواليس

كتبت- نورا طارق

حقق فيلم الست بطولة النجمة منى زكى نجاحاً جماهيرياً كبيراً منذ عرضه بدور العرض السينمائى، كما لفت الأنظار إلى موهبة صغيرة في عالم الغناء والتمثيل وهى الطفلة ناديا خطاب التي جسدت شخصية كوكب الشرق في مرحلة الطفولة، والتي استطاعت أن تبهر الجمهور بأدائها وملامحها البريئة التي جسدت المعاناة التي كانت تعيشها أم كلثوم في طفولتها في قرية طماي الزهايرة، التابعة لمركز السنبلاوين بمحافظة الدقهلية.

الطفلة ناديا: سعدت بتجسيد أم كلثوم واستمتعت بالكواليس

وتحدثت الطفلة ناديا خطاب البالغة من العمر 9 سنوات، لـ "اليوم السابع"، عن بداية رحلتها في عالم الغناء والتمثيل، حيث قالت:"اللى اكتشف موهبتى ماما وبابا واختى تمارا عشان هى بتغنى وأنا كنت بحفظ الأغانى اللى بتقولها وكان عندى وقتها سنتين وظهرت معاها فى أكتر من برنامج تليفزيونى ".

وعن دورها في فيلم "الست"، قالت :"أنا بحب التمثيل أوى ولما أعلنوا عن التقديم للفيلم فى أواخر سنة ٢٠٢٣ ماما قدمتلى والحمد لله اتقبلت مبدئياً وبعدها كنت فى الأوبرا بغنى وسمعونى وصورونى فيديو وبعدها قبلت أستاذ مروان حامد وعرفت بعدها ان الفيلم عن قصة حياه أم كلثوم فرحت أوى وبدأنا تدريب الغناء مع أستاذة نسمة محجوب والتمثيل مع أستاذه ريم حجاب وكنت أنا وأختى بندرب مع بعض فى نفس التوقيت عشان هى كانت مترشحه تعمل دور الست بس فى فتره المراهقةوبعدها فضلنا فى التدريب لمدة سنة ونص ".

وعن الأغانى التي تحبها ناديا لكوكب الشرق، قالت :"أنا بحب الست أم كلثوم جداً عشان أنا أصلاً بغنى طربى وكل الأغانى اللى بغنيها قديم عشان فى الأوبرا وأكتر أغنية بحبها لأم كلثوم هي أغنية ألف ليلة وليلة و من كتر حبى فى الأغنية غنيتها أثناء اشتراكى فى أحد برامج المسابقات الغنائية فى نوفمبر ٢٠٢٤ ".

واسترجعت الطفلة ناديا ذكريات كواليس فيلم الست، فقالت:"أنا كنت مستمتعة بكواليس فيلم الست جداً بالرغم إننا كنا بنقعد ساعات كتيرة فى اللوكيشن بس كنت ببقى مبسوطة عشان بعمل أكتر حجتين بحبهم هما الغناء والتمثيل وكنا بنبقى وسط الزراعة والأرض الطينية والدنيا برد جداً بس مكنتش ببقى مضايقة ولا تعبانة وكمان أنا بحب أستاذ مروان حامد وكنت مبسوطة وأنا شغالة معاه وهو كمان كان مبسوط منى ودايماً كان بيقولى برافوا يا ناديا".

وعن الكواليس التي جمعتها بالنجمة منى زكى، قالت :"أنا بحب طنط منى زكى أوى وإحنا اتقابلنا كتير وقت التدريب على الغناء والتسجيل الصوتى بس متقبلناش فى التصوير عشان هى كانت أيامها غير أيامى، بس كانت بتحبنى أوى وبتبقى فرحانة بيا أنا وأختى وبتشجعنا وتقولنا صوتكوا حلو أوى وهى بجد طيبة وحنينة ومتواضعة مع كل الناس".

وعن الأحلام التي تسعى ناديا لتحقيقها، قالت :"أنا بحب التمثيل والغناء أوى والدوبلاج كمان وكان ليا تجارب دوبلاج بس مش كتير والحمد لله سعيدة باللى أنا وصلت له وإن شاء الله يتعرض عليا أعمال تانية مختلفة وأدوار تبسط الناس منى ، وأنا كمان عملت دور فى مسلسل المعلم كنت بعمل دور سهر الصائغ وهى صغيرة، وأتعرض عليا أعمال فى رمضان الحالى بس مكنتش مناسبة وإن شاء الله أحقق حلمى فى المستقبل في الغناء والتمثيل والدوبلاج".