تعال شوف التلي.. قصيدة جديدة لماهر مهران

كتب الشاعر ماهر مهران قصيدة جديدة أهداها إلى محافظة أسيوط فى عيدها القومى:

مهداة إلى أسيوط في عيدها القومي

ياللي وياللي وياللي
تعال شوف التلي..
واتفضل موالحنا
المظبوطة بالملي..

أعرفك على نفسي
أنا من أسيوط
بلديات الزعيم
الراجل المظبوط
اللي في كل أفعاله
كان وطني متجلي..
ياللي وياللي وياللي
تعال شوف التلي..

أنا مصري أصيل
شارب من خمر النيل
شامخ زي النخيل
وعمري ما كنت بخيل
واللي معاي لغيري
ياكل يشرب ويحلي..
ياللي وياللي وياللي
تعال شوف التلي..

يعني النشيد الوطني
والشاعر يونس القاضي
وشعب بيقول روحي
دايما فدا لبلادي
تعيش هي وأنا عادي
أموت وأفارق ضلي..
ياللي وياللي وياللي
تعال شوف التلي..

الماضي كان بتاعي
والحاضر في  أيدي
وبعقلي وبدراعي
بكره هايكون عيدي
ما انا أسيوطي وصعيدي
وأنا السند ل خلي..
ياللي وياللي وياللي
تعال شوف التلي..

وخد عندك عمر مكرم
اللي خلع خورشيد
الوطني المنظم
اللي قدر يحشد
شعب مصر العظيم
ضد حاكم غريب
خلا بلادنا ترا لالي..
ياللي وياللي وياللي
تعال شوف التلي..

ف الطب بلسم للعالم
والزراعة لعبتنا
احنا الشعب الحالم
والعزيمة عزيمتنا
واحنا عمد وسادة
وعالية بوابتنا
ف اكتب علشان هانملي..
ياللي وياللي وياللي
تعال شوف التلي..

وف اول الفلاشة
محمد محمود باشا
اللي رفض الملك
وقال الخيانة هلاسة
وبنا ف بلاده مدارس
وخلاها أخر تجلي..
ياللي وياللي وياللي
تعال شوف التلي..

وف كل جهة وناحية
تلقا عينينه صاحية
ما احنا ديابة الجبل
واحنا بلاد الخير
اللي بتحط إيدها
في إيد الجيران
وتصنع وتبني وتعلي..
ياللي وياللي وياللي
تعال شوف التلي..

قداسة البابا شنودة
اللي عشق الوطن
وقال بلدنا روضة
نتحدا عشانها الزمن
لحد ماتعلا تاني
ول مر الكون تحلي..
ياللي وياللي وياللي
تعال شوف التلي..

النيل ف بلادنا بحر
وهوانا كله عطر
وأصغر مافينا صقر
بيصيد الأفاعي
واللي كله مكر
وينضف مايخلي..
ياللي وياللي وياللي
تعال شوف التلي..

الشيخ جلال السيوطي
بحر العلوم الدينية
والراوي والمنفلوطي
والنهضة الأدبية
ومحمود حسن اسماعيل
والنهر لما قال لي..
ياللي وياللي وياللي
تعال شوف التلي..

احنا بطولة حقيقية
مش بطولة ف تمثيلية
واسال عننا الانجليز
والناس المعتدية
يحكوا لك عن بني عدي
وعن رجال ماتخلي..
ياللي وياللي وياللي
تعال شوف التلي..

أحمد بهاء الدين
وممتاز نصار
وحبيبي فاخر فاخر
وفنانين كتار
وعلما ف كل مجال
ياللي عايز توصل لي..
ياللي وياللي وياللي
تعال شوف التلي..

في الحروب رجالة
وف السلم احنا خيالة
أسيوطي يعني استحالة
يخلف ف القوالة
زي التهامي والتوني
يالله سمي وصلي..
ياللي وياللي وياللي
تعال شوف التلي..

من بحري سيدنا الفولي
من قبلي سيدنا الفرغل
انا مصري عارف أصولي
ولو هاتزعل ازعل
هلالي أنا ف قولي
وجدعنة ورجولة تملي..
ياللي وياللي وياللي
تعال شوف التلي..

ولو فتحت الكتاب
هاتلاقي مستجاب
ومحمود البدري
في طليعة الكتاب
اللي الرمية منهم
عمرها ما بتجلي..
ياللي وياللي وياللي
تعال شوف التلي..

آثارنا على الجانبين
من أبد الآبدين
تلقي مير والبداري
ع الحضارة شاهدين
شاخ الزمن وهما
لسه شباب قاعدين
سكر قصب بيحلي..
ياللي وياللي وياللي
تعال شوف التلي..

في كل شبر سبع
وتحت النخل أسودة
لو حد يعادينا
هايلقا أيامه سودة
وهايودعوه بالصراخ
واللطم وكام عدودة
والندم علي...
وياللي وياللي وياللي
تعال شوف التلي