فيسبوك
واتساب
في ظل اللي بيحصل حوالينا من تضخم، أزمات عالمية، وحالة عدم استقرار، طبيعي جدًا الناس تسأل: "هو في حاجة بتتغير؟ هو إحنا ماشيين في سكة إصلاح بجد؟ ولا دي مجرد أرقام وخلاص؟"
والحقيقة إن موازنة مصر للسنة الجديدة 2025/2026 مش مجرد شوية أرقام مكتوبة، دي بتوضح إن الدولة بتحاول توازن ما بين إنها تضبط مصاريفها وتزود دخلها، وفي نفس الوقت تحاول تحافظ على جزء من الدعم وتحرك الاقتصاد.
المقال ده هنحاول نشرح الصورة كاملة :
- الإيرادات والمصروفات:
السنة دي الدولة متوقعة تجمع 3.1 تريليون جنيه،
وده أعلى من السنة اللي فاتت اللي كانت حوالي 2.6 تريليون، يعني فيه زيادة تقريبًا 19%.
- أما المصروفات، فوصلت لـ4.6 تريليون، مقارنة بـ3.9 تريليون السنة اللي فاتت، بزيادة 18%.
اللي مهم هنا مش الرقم الكبير، لكن إن معدل الزيادة في الإيرادات أكبر من المصروفات وده أول مؤشر إن فيه محاولة لضبط الأمور.
فائض أولي وعجز كلي، إزاي الاتنين مع بعض؟
الدولة بتستهدف فائض أولي 795 مليار جنيه،
وده معناه إن الإيرادات أكبر من المصروفات الأساسية (زي المرتبات والدعم) قبل ما نحسب فوائد القروض.
السنة اللي فاتت الفائض الأولي كان حوالي 600 مليار، يعني فيه فرق أكتر من 30% زيادة السنة دي.
والهدف إن العجز الكلي يبقى أقل من 5.5%، مقارنة بحوالي 7% السنة اللي فاتت قبل ما تدخل إيرادات استثنائية زي صفقة رأس الحكمة.
- اما بخصوص الدعم، فلازم نعى انه بيتغير مش بيتشال!
الرقم الإجمالي للدعم والمنح والمزايا الاجتماعية وصل لـ732.6 مليار جنيه،
وده رقم مش صغير، وبيزيد بنسبة 15.2%.
الدولة بتقول إنها بتحاول تخلي الدعم رايح لمستحقيه، مش يبقى عام وعشوائي.
يعني مثلًا:
160 مليار للتموين والخبز
54 مليار لـ"تكافل وكرامة" بعد زيادته بنسبة 35%
دعم المحروقات نزل من 154 مليار لـ75 مليار بس
دعم الكهرباء 75 مليار كمان
آه، في دعم بيقل، بس بيتحول لدعم موجه.
يعني بدل ما تدعم البنزين للي راكب عربية 10 مليون،
تدعم طفل في مدرسة أو أم معيلة مش لاقية دخل ثابت.
- المرتبات والصحة والتعليم، في محاولات للتعويض
مرتبات العاملين بالدولة وصلوا لـ679.1 مليار جنيه، بزيادة حوالي 18%.
هل كفاية؟ مش دايما، بس ده معناه إن فيه نية لتحسين الأجور بشكل تدريجي.
في قطاع الصحة والتعليم:
22 مليار للأدوية
15.1 مليار للعلاج على نفقة الدولة
5.9 مليار للتأمين الصحي للطلاب والسيدات والأطفال
الدولة بتقول إنها استوفت الاستحقاقات الدستورية، وده معناه إن مفيش تهرب من صرف المخصصات دي.
- دعم الإنتاج والتصدير، استثمار في اللي جاي:
78.1 مليار جنيه لدعم الأنشطة الإنتاجية،
وده رقم 3 أضعاف اللي كان بيتصرف قبل كده، ودي حاجة مهمة.
المبادرات شملت:
دعم السياحة بـ8.3 مليار
5 مليار للأنشطة الصناعية
3 لـ5 مليار حوافز للمشروعات الصغيرة
ومليار لتوفير عربيات غاز للشباب والتاكسي
يعني فيه شغل على "اللي بيجيب دخل" مش بس "اللي بيستهلك دعم"
في الآخر، إحنا رايحين على فين؟
الوضع مش مثالي اكيد، ولسه التحديات موجودة،
بس اللي واضح من الموازنة دي إن فيه:
محاولة حقيقية لتقليل العجز
رفع كفاءة الإيرادات
التزام بالإنفاق الاجتماعي
ضخ استثمارات في قطاعات منتجة
تحول تدريجي من دعم عشوائي لدعم موجه
هل المواطن حاسس بكل ده؟ مش بالشكل اللى الكل يتمناه، خصوصا بسبب الأوضاع الجيوسياسية المحيطة بينا
لكن اللي نقدر نقوله إن الصورة بتتحرك، حتى لو لسه الإحساس مش كامل.
هي مش مسألة إن الدنيا هتتحسن بكرة،
بس لو استمر التنفيذ بنفس الاتجاه… فيه أمل كبير إن اللي جاي يبقى أهدى من اللي فات.
