مصطفى أسامة يكشف كواليس تصميم الدليل الرسمى للمتحف الكبير

الخميس، 06 نوفمبر 2025 09:00 م

الدليل الرسمى للمتحف المصرى الكبير

كتبت- نورا طارق

حرص الآلاف من الأشخاص من مختلف الجنسيات على زيارة المتحف المصرى الكبير منذ افتتاحه رسمياً أمام الجمهور، لمشاهدة القطع الأثرية التي تحكى كل منها جزءا من تاريخ أعظم حضارة وجدت على وجه الأرض، وهذا ما شعر به كل من عمل في هذا المتحف مثل مصممى الجرافيك مصطفى أسامة وزياد السماحى اللذين شاركا فى فكرة تصميم الدليل الرسمى للمتحف المصرى على هيئة الأهرامات الثلاثة، بالتعاون مع فريق التصميم زكى الدمرواى وخالد مختار والمصور حسن دسوقى.

مصطفى يكشف كواليس تصميمه للدليل الرسمي للمتحف الكبير

وتحدث مصطفى أسامة عبد المولى، مخرج فني والرسّام وأحد مصممى الدليل الرسمي للمتحف المصرى الكبير، عن عمله وكواليس ترشحه لتصميم الدليل، حيث قال لـ"اليوم السابع": "أنا بقالي 10 سنين بشتغل في مجال التصميم والإعلان، اشتغلت في شركات كبيرة داخل وخارج مصر، وكمان اشتغلت كمصمم حر (Freelancer) لفترة طويلة ولسه مستمر لحد دلوقتي، وحائز على جوائز محليه ودولية في مجال التصميم".

وتابع: "ترشحت لتصميم الدليل الرسمي للمتحف المصري الكبير (GEM) من خلال شغلي بإحدى وكالات الدعاية والإعلان، والمشروع ده بالنسبة لى من أكتر المشاريع اللي كنت متحمّس ليها جدًا، لأنه مش مجرد دليل ده واجهة لمكان تاريخي العالم كله مستنيه".

وتحدث مصطفى عن فكرة تصميم الدليل الرسمي للمتحف المصرى الكبير، حيث قال: "فكرة التصميم نفسها كانت مستوحاة بشكل مباشر من شعار المتحف المميّز، وهو أيضاً يعكس الهوية المعمارية للمتحف، التصميم مكون من 6 صفحات، الغلاف يعكس بشكل صريح شعار المتحف، ولما يفتتح بالكامل وينظر إليه من أعلى الزائر بيشوف تكوين هندسي بيحاكي شكل الأهرامات الثلاثة والتصميم قائم على زوايا حادة وخطوط قوية بتعكس روح الحضارة المصرية القديمة في شكل عصري حديث، وبتعبّر عن الخلود والربط بين الماضي والحاضر، والهدف إن كل زاوية وكل تفصيلة في الدليل تحكي نفس القصة اللي بيحكيها المتحف، وتكون امتداد لعظمة التحفة المعمارية من الداخل والخارج".

وعن مدة تصميم الدليل قال مصطفى: "الفكرة نفسها والتصميم المبدئي أخدوا تقريبًا أسبوعين فقط، وتم عرضهم على المسئولين، واتوافق عليهم من أول مرة وده كان إنجاز كبير في وقت قصير جدًا. بعد كده بدأنا مرحلة تصميم المحتوى الداخلي والصور وخريطة المتحف، وبعدها مراحل الطباعة والإنتاج، وده كله استمر حوالي سنة كاملة عشان نضمن أن كل تفصيلة تطلع بأعلى دقة وجودة تليق بحجم المشروع".

تابع: "في البداية جرّبنا أنواع مختلفة من الورق والخامات والأحجام، وكل تجربة كان ليها طابع مميز، لكن في النهاية اخترنا الشكل الأبسط والأشيك: ورق سميك بملمس مط، بيدي إحساس بالفخامة وناعم في نفس الوقت، وطوله تقريبًا 20 سم، مناسب في الإيد وسهل الاستخدام".

وعبر مصطفى عن سعادته اختياره لتصميم الدليل حيث قال: "الإحساس بالمشاركة في مشروع بالحجم ده صعب يتوصف الصراحة، شرف كبير جدًا إن يكون ليّا بصمة في حاجة بتوثّق تاريخ مصر وبتتقدّم للعالم كله. وكل مرة هزور فيها المتحف وأشوف الزوّار من كل أنحاء العالم ماسكين الدليل، هاحس بفخر حقيقي طبعاً".

وأنهى مصطفى حديثه معبراً عن أمنيته التي يسعى لتحقيقها، حيث قال: "نفسي أكمّل في مشاريع ليها تأثير ثقافي وإنساني، سواء داخل مصر أو في الخارج، مشاريع بتوصل رسالة وبتحتفي بالفن والهوية من خلال التصميم. وإن شاء الله أقدر أوصل بفني وتصميمي لأكبر عدد من الناس حول العالم".