تحدث الممثل آدم الألفى، في لقاء خاص على تليفزيون "اليوم السابع" من كواليس تصوير المسلسل الجديد "دواعى السفر" عن علاقته بعشرة عمره أصدقائه في فريق كايروكى، وهم أمير عيد وتامر هاشم وشريف وهوارى وهل من الممكن يتجمعون في فيلم عن رحلة صعود الفريق وعلاقتهم هما الخمسة مع بعض.
وقال آدم: "أمير عيد بالنسبة ليا عنده رؤية وجريء وأقوله ريح دماغك من الشغل الكتير، تامر هاشم عفوى جدًا وعاوز يبقى أهدى شويه، هوارى فنان وشريف متوازن وعارف بيعمل إيه".
وأضاف آدم في حديثه: "لو لم يوجد فريق كايروكى كنا هنفضل صحاب ودى حاجة بتربطنا من أكتر أي حاجة، كايروكى بالنسبة ليا عيلة وليس شغل وشهرة وفلوس هما سند في الحياة وعيلتى الثانية، ومعتقدتش أن إحنا في يوم من الأيام الفريق ممكن ينفصل إحنا هنكبر مع بعض وممكن نفضل نعزف سوا لحد سن السبعين لأن ده اللى بنحب نعمله وده اللى بيسعدنا أن إحنا نعمل مزيكا مع بعض وأعتقد خلاص السنين عديت وبقينا بنعرف نتعامل ونفهم بعض وبقى لا يوجد مشاكل، وممكن نعمل فيلم عن رحلة صعود الفريق في يوم من الأيام، وبتمنى أن فريق كايروكى يبقى عند حسن ظن الجمهور اللى بيسمعه".
والمسلسل مكون من 10 حلقات، ويعرض يوم 15 مايو ومن بطولة أمير عيد، كامل الباشا، نادين، أحمد غزى، أيمن الشيوى، جلا هشام، أحمد فاضل، دنيا وائل، سلمى الكاشف، نادر جوده، آية حلمى، آدم الألفى، مريم ناعوم، ياسمين سمير.
ويتعاون النجم أمير عيد مع السيناريست محمد ناير في مسلسل دواعى سفر للمرة الثالثة بعد مسلسل ريفو، وهى التجربة الأولى لمحمد ناير في الإخراج وهو مؤلف المسلسل أيضًا.
ويعد مسلسل دواعى السفر أولى تجارب محمد ناير في عالم الإخراج التليفزيونى، بعد النجاحات الكبيرة التي حققها في عالم التأليف ونالت على إعجاب الجمهور وآخرها مسلسل ريفو بجزأية، مما شجعه على خوض التجربة الإخراجية ويكون في العمل المؤلف والمخرج.
والمسلسل من أعمال منصة WATCH IT الأصلية لينضم لسلسلة مسلسلات المنصة الأصلية وآخرها مسلسل لحظة غضب والذي عرض في موسم رمضان 2024، وعرض حصريا على منصة watch it من خلال 15 حلقة، وكان بطولة صبا مبارك، محمد شاهين، على قاسم، ناردين فرج، سارة عبد الرحمن، ريم خوري، وغيرهم من الفنانين، وهو من تأليف مهاب طارق، وإخراج عبد العزيز النجار، وإنتاج تى فيجن للمنتج طارق الجناينى.
تم أضافة تعليقك سوف يظهر بعد المراجعة