بمظهر حضارى انيق لا يقل عما نراه فى شوارع باريس، تقف سيارة من نوع "فولكس" مفتوحة السقف ومضيئة بمظهرها الجذاب تعتليها شمسية مضيئة ويقف عليها شاب مهذب جميل الروح يدعى "مصطفى"، متخصص في عملية البيع بلسانه الحسن، يبتسم فى وجه الزبون ابتسامه تجعل كل من ذاق مشروبه ياتى اليه مرة أخرى، فشعاره العمل ثم أي شيئ آخر.
ويقول "مصطفى": "انا صممت العربية ديه عند حداد وطلبت منه بعد ما اشترتها انى افصل السقف عن العربية علشان ابدأ مشروعى عليها، وبعد ما شيلت السقف قررت احلو الشنطة لمخزن للتموين بتاعى، وكمان غيرت الكراسى وحولتها لمخزن الا الكرسى بتاع القيادة لان العربية بتتحرك وبتمشى كمان".
وتابع، "العربية ديه فاتحه 3 بيوت لأننا 3 شباب في مقتبل العمر شغالين عليها وتوصلنا لمشروع سيارة المشروبات المتنقلة ده بعد بحث ودراسة طويلة حطيت فيها تحويشة العمر، كل اللى كسبته في الفترة الأخيرة عملت بيه المشروع ده، ولما بدأت المشروع بعد ما خدت كل التراخيص المناسبة ربنا كرمنى من فضله وبفضل دعوات امى وابويا مريض السرطان".
واستكمل، "والدى مريض ومنساش ابدا وقفته معانا وجه دورى دلوقتى علشان اسنده في مرضه واقف جنبه في الحياة واكرمه زى ما اكرمنى انا واخواتى، وانا دلوقتى المسئول عن البيت ومصاريفه فا بنزل كل يوم شغلى برمى تكالى على الله وربنا بيكرمنى".
واردف، "الزباين بتجب تيجى تشرب من عندى لانى لسانى حلو وبقابل الزبون بابتسامة حلوة، وكمان بقدمله منتج نضيف وشيك يسر قلبه وهو بيشربه، وديه سياسة البيع بتاعتى لان اللى بيجى يشرب فنجان قهوة بيكون مزاجه مش رايق ومصدع وعايز يفوق شوية فا بالابتسامة والكلمة الحلوة سر النجاح ".
ومن الجدير بالذكر، أن محافظة القاهرة بدأت فى إصدار تراخيص لعربات المأكولات الثابتة بالشوارع، كأحد المشاريع الخاصة بالشباب، لسيارات الطعام والشراب المتنقلة للشباب، تنفيذًا لأحكام القانون 92 لسنة 2018 بشأن تنظيم وتشجيع عمل وحدات الطعام المتنقلة، وبلغت رسوم الترخيص 9 آلاف جنيه لمدة 3 سنوات.
وأكدت محافظة القاهرة، أن أوراق التقدم للحصول على الرخصة "شهادة سلامة الغذاء من هيئة الاستثمار، وشهادة صحية، وصورة شهادة المؤهل، وصورة بطاقة سارية، برنت تأمين، فيش وتشبيه، الموقف من التجنيد للذكور، وشهادة الخدمة العامة للإناث، وصورة ضوئية للمركبة من الداخل والخارج، وطلب بخط اليد موجه للمحافظة.
ويشترط أن يكون المتقدم للحصول على الرخصة من أبناء المحافظة، ويقترح مكانين فى نطاق حى واحد، ولا يشترط أن يكون من سكان نفس الحى، وعند الموافقة على الرخصة يتم دفع رسوم 9 آلاف جنيه، ويتحمل تكاليف إنشاء العربة الخاصة به وفقا لمواصفات هيئة سلامة الغذاء وهيئة الاستثمار.
تم أضافة تعليقك سوف يظهر بعد المراجعة