الكثيرات من الفتيات المقبلات على الزواج يشعرن بالحيرة عند اختيار قطع الأثاث والأدوات المنزلية، وقد تخطأ بعضهن وتشترى الكثير من الأدوات، ما يتسبب فى إحداث فوضى بمنزلهن، أو قد لا تستفيد من بعض الأدوات التى اشترتها بسعر غالٍ، ولهذا استطلعنا رأى بعض المتزوجات حديثاً، عن الأدوات والأغراض التى لا يجب شراؤها وكانت كالآتى:
ملايات ومفارش السرير الكثيرة
قالت زينب حسين متزوجة حديثاً وفى العشرينات من عمرها لـ"اليوم السابع": "أنا ندمت كتير بسبب كمية الملايات اللى اشتريتها وكمان مفارش الصباحية كفاية تشترى واحد منها أو يفضل بلاش منها لأن بصراحة الموضوع مالوش لازمة وكمان يفضل أن الواحد يشترى 10 أو 7 ملايات وكمان الملابس أنا اشتريتها كتير معظمهما مركونة فى الدولاب بسبب إن الموضة كل يوم بحال".
شنطة الشوك والسكاكين
وقالت آية جمعة متزوجة حديثاً وفى العشرينات من عمرها: "بصراحة شنطة الشوك والسكاكين كانت من الأخطاء اللى عملتها فى جهازى وكلفتنى مبلغ وكمان النيش مش مهم.. أنا متزوجة من 3 سنوات مش بقرب من النيش ولا استخدمت منه حاجة".
النيش
وتابعت آية: "النيش ثم النيش كله على بعضه مالوش لازمة لكن شكليات فى الحقيقة ويفضل استبداله بشراء أجهزة كهربائية أو أى حاجة تنفعنا أفضل من مصاريفه".
الشواية الكهربائية
وقالت آية عادل "الشواية الكهربائية حبيت أشتريها بدل الجريل واكتشفت إنها مش عملية بصراحة ومش حاجة أساسية".
وأضافت صافى دياب: "مفرش السرير والدفاية الكهربائية وسفرة المطبخ كل الحاجات دى مالهاش لازمة خالص لكن أفضل حاجة غسالة الأطباق".
المفارش الستان
وقالت مى محمد متزوجة حديثاً: "المفارش الستان والملابس الكثيرة والعشرين طقم حلل بلاش منهم، ويفضل شراء طاقمين أو ثلاثة لأنى اشتريت أكثر من 8 أطقم حلل مش بستخدم غير طقم واحد بس".
غرفة معيشة
شراء مفارش ومراتب
أوانى
تم أضافة تعليقك سوف يظهر بعد المراجعة