أعرب البرتغالى ريكاردو سواريز، المدير الفنى للأهلى، عن سعادته بالفوز على المصرى بهدفين نظيفين فى المباراة التى جمعتهما مساء الأربعاء على استاد برج العرب، ضمن منافسات الجولة الثلاثين من عمر الدورى، مثنيا على حالة أرضية استاد برج العرب قائلا: "كل مرة نلاقى الملعب ظروفه كويسة تساعدنا أننا نلعب كرة كويسة وأشكر المسئولين على تحسن حالة الملعب".
وعن عدم الاعتماد على الناشئين الذين تألقوا فى مباراة الاتحاد السكندرى الأخيرة، قال خلال المؤتمر الصحفي: "اللى حصل لعبنا مباراة من ثلاثة أيام وزى ما أنا قلت فى مقابلات سابقة لازم يكون فيه طريقة نخلى اللعيبة الصغيرين يشاركوا بيها، وعملنا مباراة فزنا فيها بثلاثية باللاعبين الناشئين وكان معانا 3 أيام بعدها يومين قبل اللعب مع الفريق".
وتابع سواريز: "الأهم ثقة اللاعبين الصغار بعد الفوز بثلاثية ماينفعش إنها تقع بس أكيد الحمل البدنى بتاعهم مش هيكون 100% وكذلك الثقة والخصم بقاله 7 أيام بيجهز للمباراة، ولو ما عملناش كدة اللاعبين الصغيرين اللى عملوا مباراة جيدة مكنوش هيبقوا جاهزين يعملوا مباراة جيدة اليوم وده كان قراري".
وأوضح: "الفريق أدى مباراة جيدة واللاعبون كانوا متحدين وقدروا يترجموا الخطة اللى كنا حاطينها، وفزنا على فريق منظم فيه مهارات فردية وجماعية، وأحيى لاعبينا أنهم عملوا مباراة جيدة وفيه لحظات مكناش فيها أحسن حاجة، والخصم كان أفضل لكن كنا منظمين وانتظرنا الفرص المناسبة عشان نسجل هدف والفوز جاء عن استحقاق".
وعن اللعب بطريقة 3 / 4 / 3 أكد سواريز: "أول حاجة أبص للاعب وأشوف خصائصه وبختار أفضل أسلوب وفقا لهذه الخصائص، وده يعتبر الأسلوب اللى يخدم الأهلى فى الظروف اللى كنا فيها ولكن فى المستقبل الوضع هيتغير و4 / 3 / 3 هو الأسلوب الذى أحاول زرعه مع اللاعبين فى الفترة القادمة، وكنت ألعب بأسلوبين مع جيل فيسنتى ولعبنا بثلاثى فى الخط الخلفى، لأن خصائص اللاعبين أفضل من اللعب برباعى فى الخط الخلفى".
تم أضافة تعليقك سوف يظهر بعد المراجعة