استجابة لتليفزيون اليوم السابع.."الجيزة" تسلم كشكا لأسرة مرض السمكية (فيديو)

سلمت محافظة الجيزة كشكا لأسرة السمكية، والتي يعاني ثلاثة من أفرادها من الإصابة بمرض قشر السمكية، وذلك فى استجابة سريعة لما تناولته حلقة برنامج "صندوق محسوب" على تليفزيون اليوم السابع والذي يقدمه الزميل محمد محسوب .

ووجهت والدة الأطفال الشكر لمحافظة الجيزة على الاستجابة لها، موضحة أن الكشك سيساعدها في الإنفاق على أطفالها المرضى.

كما وجهت الشكر لتليفزيون اليوم السابع الذي يتبني نشر حالتها ومتابعتها حتى تحقيق مطالبها .

وكانت قد قالت الأم خلال حلقة برنامج "صندوق محسوب" إن بناتها ولدن بالمرض، ويعانين منه لدرجة أن أجسامهن تنزف دما في الصيف، ولا يطيقن ملابسهن، وتحدثت الأم عن مأساة بناتها مع الأهل والجيران، حيث قالت : أهلى قاطعوني من ٧ سنين، وأكتر أول ما خلفت بنتي المصابة بالسمكية قالولي متجيش عندنا تاني بيهم، عايزة تيجي تيجي لوحدك لتعدينا"٠

وأضافت: والله العظيم اتذلينا، محضرتش فرح حد، كان فيه فرح بنت أخويا وبنت أختي، وقالولي متجيبيش ولادك معاكي، علشان الناس، قولت مش رايحة أنا اللي يكره ولادي كأنه يكرهني أنا، أنا شقيانه وتعبانة عشانهم، أنا عندي عيالي بالدنيا كلها"، وتابعت باكية: أنا محدش راضي بينا، علشان ولادي أخر مرة شوفت حد من أهلى من 7 سنين.

وقالت" نهي الكبيرة في تالتة إعدادي مكنوش عايزين يقبلوها، لكن أنا جبت ليها تقرير علشان أقول إنها سليمة، وقبلوها والحمد لله، الأولى على المدرسة السنادي"، وتحدثت الأم عن أن الجيران والأهالي يرفضون لعب بناتها مع أبنائهم، قائلة " كل أما يلعبوا مع حد، أهله يقولولي خلوا ولادك ميخرجوش في الشارع علشان ولادنا"٠

وذكرت: ولادي لما بيخرجوا الناس بيقولوا لهم، إيه اللي فيكوا، دا إنتوا مولودين كدا؟"، متابعة "دا بيزعلهم علشان كدا مش بخرجهم"، وقالت: الناس القريبة بتخاف تعزمنا في افراحهم، الغريبة هتقبلنا، عيالنا يقعدوا معانا".

وقالت "أم نهى"، والدة " بنات السمكية"، إن الطبيب يقبل رأس بناتها حينما يراهن، وأضافت: بناتي بيصرفوا 1500جنيه دواء في الشهر، بس مش قادرة اكفيهم وبضطر أدهن جسمهم زيت زيتون، علشان جسمهم يهدى، لأن مفيش فلوس كفاية أجيب ليهم دواء".

وتابعت : في الصيف بيناموا على البلاط ومش بيطيقوا الهدوم بسبب النار اللي في جسمهم وقلة الدوا، كمان بيستحموا بمية سخنة وجسمهم بيجيب دم، وذكرت أنها مديونة الآن بحوالي 40 ألف جنيهن بسبب مرضهم، ولا تعرف ماذا تفعل.

وتابعت : بنتي نهي الكبيرة بتقوم الفجر، وتقول يا رب اشفيني أنا وأخواتي يا رب من الآلم والوجع، رغم إن المرض دا ملوش دوا بيدهنوا ملطفات بس"، وذكرت أن الطبيب طلب منها وقف الأدوية لهن، بسبب ضعف الطعام اللى يقمن بتناوله، مضيفة" الدكتور قالي يا أم نهي أكليهم حرام عليكي"٠

وقالت، أنا محتاجة مصدر رزق، أصرف على علاجهم، وأنا مش عايزة اتقل على حد أنا عايزة أوفي دواهم من تعبي من كشك صغير.

برنامج صندوق محسوب يقدمه الزميل محمد محسوب علي تليفزيون اليوم السابع ويتناول العديد من القصص من الشارع المصري ، ويسلط الضوء علي الحالات والأشخاص المتفردة في مجالات بعينها ويضعهم في بؤرة الاهتمام.