أكرم القصاص

ميمى جمال: دخلت مجال الفن فى عمر 9 سنوات.. مشتغلتش طول فترة مرض زوجى وحب عمرى حسن مصطفى علشان أكون جنبه.. بحب قعدة البيت وأحفادى كل حياتى.. سمير غانم كان زى الترمومتر على المسرح وكل يوم بدعى لدلال تقوم بالسلامة

الثلاثاء، 01 يونيو 2021 11:29 ص
ميمى جمال: دخلت مجال الفن فى عمر 9 سنوات.. مشتغلتش طول فترة مرض زوجى وحب عمرى حسن مصطفى علشان أكون جنبه.. بحب قعدة البيت وأحفادى كل حياتى.. سمير غانم كان زى الترمومتر على المسرح وكل يوم بدعى لدلال تقوم بالسلامة ميمى جمال
سارة صلاح

مشاركة

اضف تعليقاً واقرأ تعليقات القراء

حلت الفنانة ميمى جمال، ضيفة على الإعلامية لميس الحديدى، فى برنامجها كلمة أخيرة الذى يذاع على قناة ON، وكشفت العديد من الأمور عن حياتها الشخصية والفنية، أبرزها سبب غيابها عن الساحة الفنية على مدار الـ 5 سنوات الماضية وحقيقة اعتزالها التمثيل، وتطرقت لعلاقتها بزوجها الراحل الفنان حسن مصطفى وكشفت كواليس فترة مرضه والتى قررت فيها عدم العمل لتكون بجانبه، وتحدثت عن أمور أخرى.

وقالت ميمى جمال: "الفترة اللى اشتغلتها مكنتش قليلة بدأت وأنا عندى 9 سنوات، وبعد كده كملت مدرسة وسمعت في الجامعة إنهم بيصوروا بين الأطلال للمخرج عز الدين ذو الفقار، فروحت وفكّرته بنفسى إنى صورت معاه وأنا 9 سنين في أقوى من الحب، وخدت الدور ورجعت البيت مبسوطة جدا، ومن الجامعة بدأت أدوار صغيرة".

 وروت الفنانة ميمى جمال، قصة حبها لزوجها الفنان الراحل حسن مصطفى ولماذا توقفت مرتين خلال مسيرتها الفنية.

وقالت ميمى: "مرتين قعدت فيهم مش اعتزال، مرة لما والدتى تعبت أوى وجالها زهايمر، واعتذرت عن دور "راجل وست ستات" ورجعت العربون، وتانى مرة بعد وفاة زوجى حسن مصطفى، وهو رجل طيب وحنين وعطوف وكل صفات الدنيا فيه وخلفت بعد سنة ونصف، جبنا نورا ونجلا، ولما العمر ده كله يتعب أروح أسيبه وأمثل لا طبعا، 28 يوم قعدت تحت رجله في المستشفى، وآخر يوم شافنى قاعدة حاطة إيدى على خدى، فقالى ميمى نزلى إيدك من على خدك هتحطى بعديها كتير ممكن أشرب مايه وشرب واتوفى".

1
 

وتحدثت عن قصة حبهما، قائلة: "كنا زملاء مع بعض في المسرح، وهو عنده مشاكل مع زوجته، وكان مش عجبنى الدور اللى بقدمه ومتضايقة، لقيت حسن جه وبيقولى أنا كمان مش عجبنى حاجات في حياتى الشغل ملهوش دعوة، بدأت صداقة نشتكى لبعض ونرغى سوا، بدأ الكلام يطلع حسن وميمى، جابنا سيد بدير في المسرح، وقال ايه الكلام اللى طالع عليكو انتو، فيه حاجة بينكم، فقلت لا إحنا أصدقاء مفيش حاجة بينا".

وأضافت: "جه حسن قالى أنا طلقت من 3 شهور لو طلبت منك الزواج توافقى قلتله إيه المفاجأة دى وماما مكنتش موافقة عشان راجل كبير وعنده بنت والوسط مش كويس، وكنت محتاجة ضهر، فكلمته قلتله أنا موافقة اتجوزك واتجوزنا".

وعن كواليس مسرحية "الدلوعة"، التي شاركت فى بطولتها مع الفنانة الراحلة مارى منيب، وقالت ميمى جمال"بدأت عروض المسرحية لقيت مارى منيب عاوزانى في الغرفة وقالت لى إنتي إيه خايلتيني رايحة جاية في العرض، وأنا عندي إيفيهات برميها في الصالة وإنتي رايحة جاية بتكسري إيفهاتي لما أكون بكلم على المسرح متفضليش رايحة جاية قدامى خلتنى رديت عليها وقلتلها: أنا عاوزه اتعلم منك وهنفذ كل أوامرك وبعد الموقف ده بقى بينا علاقة صداقة كبيرة".

2

وأضافت ميمى جمال: "ابتعدت عن التمثيل بعد فيلم لف ودوران للنجم أحمد حلمى، وقعدت فترة أفكر أرجع مرجعش أرجع مسرح سينما أنا خدت على قعدة البيت، وبطلع الساحل بمزاجي بقعد على البحر، ومش بلتزم بمواعيد، وعندى 3 أحفاد هم كل حياتى، كنت حاسة إنى مش عاملة معاهم حاجة وأنا بشتغل وورايا تصوير".

كما تحدثت  ميمى جمال، عن ذكرياتها مع الفنان الراحل سمير غانم في كواليس المسرحيات التي قدماها معا، وقالت "سمير غانم زى الترمومتر على المسرح بيقيس الجمهور من أول إفيه يقوله شافهم ضحكوا أوى يكمل ولو شافهم مش أوى يرمى واحد وراء التانى لحد ما يقعوا من الضحك، واللى بتبقى قدام سمير غانم على المسرح لازم تبقى واعية أوى امتى هيقول إفيه جديد وامتى هيقفل المسرحية، وآخر مسرحية  قدمناها سوا "دو رى مى فاصوليا" قال، أفيه ضحكنى أوى وقعت من الضحك وزعلت أوى لما اتوفى".

وتابعت: "كل يوم بدعى لدلال تقوم بالسلامة وبكلم رامى رضوان كل يوم اطمئن عليها وبطلب من ربنا بناته ما يشفوش اللى شافته بناتى وقت وفاة والدهم حسن مصطفى، أنا كنت جنبهم ويا رب والدتهم تقوم ليهم بالسلامة".


مشاركة

اضف تعليقاً واقرأ تعليقات القراء



لا توجد تعليقات على الخبر
اضف تعليق

تم أضافة تعليقك سوف يظهر بعد المراجعة





الرجوع الى أعلى الصفحة