توت عنخ أمون وشنطة وتابلت.. آية تصنع منحوتات دقيقة من الكيك وعجين السكر

اعتدنا على الشكل التقليدى للتورتة حيث الكعكعة المصممة بشكل دائرى، مع إضافة بعض الكريمة والشيكولاتة وإضافة قطع ألفواكة فى بعض الأحيان، وهذا ما لفت نظر آية أبو الحمايل، ففكرت أن تجمع بين موهبتها الفنية التى تعشقها منذ طفولتها وهى الرسم وعمل الحلوى، لتتبع الطرق الجديدة وهى عمل الحلوى المجسمة، وتنفذ أفكار مختلفة ومميزة، فاستطاعت تصميم تورتة على هيئة أشكال مختلفة مثل الحقائب والكاميرات وتماثيل فرعونية وغيرها من الأشكال غير تقليدية، والتى تجعلك تشعر للوهلة الأولى إنها حقيقة .

تحدثت آية أبو الحمايل، خريجة كلية الأداب قسم مساحة وخرائط، لـ" اليوم السابع"، عن هوايتها التى حولتها لمشروع صغير، حيث قالت :" بحب الرسم جداً من صغرى وبقالى حوالى 8 سنين، شغالة فى الرسم وكنت عملت قبل كده مشروع صغير لرسم بورتريهات، وموضوع الكيكة المجسمة بدأته من سنة تقريباً مع أول كيكة عملتها فى حياتى كلها لحد عزيز عليا، وبعدين ماما وجوزى وكل اللى حواليا شجعونى إنى أجرب ثانى وثالث، وعملت كيك كتير وباظت لحد ما اتمكنت من عمل كيكة مجسمة من غير غلطة".

أية مع تورتة توت عنخ أمون

وتابعت :" أول تورتة منحوتة عملتها كانت على شكل كاميرا، وناس كتير انبهرت بيها وده فرحنى جداً وشجعنى أعمل أكتر، وبالفعل بدأت أنفذ أفكار كتير".

تورتة على شكل كاميرا

تورتة على هيئة تمثال

حرصت آية على عمل كيكة مجسمة على هيئة أشكال مختلفة تجعل من يراها لا يتوقع أنها حلوى، حيث قالت :"عملت كيكة على شكل بيتزا وشنطة وحاجات كتير وكل مرة، الناس بلاقى تعليقات بتشجعنى أكتر على الاستمرار وبتحمسنى، وطبعاً أحياناً بشتغل تورتة عادية، حسب طلب الزبون".

تورتة على هيئة بالطو أبيض

تورتة على هيئة باقة زهور

لم تتعلم آية طريقة عمل الكيكة المجسمة، من خلال الحصول على دورات  تعليمية فى أى مكان ولكن اعتمدت على نفسها، حيث قالت:" اتعلمت عمل التورتة المجسمة من خلال فيديوهات اليوتيوب، وكنت بجرب كتير عشان أعرف الأخطاء ومكررهاش تانى بعد كده".

تورتة على هيئة دجاج

تورتة على هيئة حقيبة

تفضل آية، تصميم تورتة تشبه أحد المشاهير، حيث قالت :" أنا بحب الرسم أصلا وبحب أحدد ملامح البنى أدم وتقسيماته وأطلع ده فى التورتة، وجربت ده فى تورتة توت عنخ أمون، وده كانت أكتر تورتة خدت منى وقت ومجهود، ونفسى ألفترة الجاية أعمل تمثال الملكة نفرتيتى"

تورتة على هيئة توم وجيرى

تحلم آية بأن يكبر مشروعها فى المستقبل وتصمم تورتة على هيئة تماثيل فرعونية، لتساعد فى تنشيط السياحة، حيث قالت :" نفسى أفتح مشروع جنب المتحف المصرى الجديد، وأعمل فيه كيك أو مينى كيك وكوكيز على أشكال تماثيل فرعونية، عشان أنشط السياحة، ويكون عندى فقرة فى برنامج تليفزيونى، أعلم فيه الناس يعملوا عجنة السكر".

تورتة مجسمة

تورتة على هيئة هاتف

تورتة على هيئة نقود

تورتة على هيئة نجف

تورتة