عشقت الرسم منذ طفولتها فكانت تحرص دائماً على رسم كل ماتراه وتتأثر به لتعبر عنه فى كراستها الصغيرة وأقلامها المحدودة، لترسم شخصيات كرتونية أو أشجار وهكذا حتى كبرت وطورت من هوايتها، ورغم دراستها للهندسة المعمارية، إلا إنها لم تنسى الفن، وتعلمت الرسم على اللوحات الخشبية وأبدعت فيه، وبمناسبة شهر رمضان، رسمت بريشتها أدعية دينية وفوانيس وأجواء رمضانية ليهديها أى شخص لعزيز عليه.
تصميم أخر لأسماء محمود
تحدثت أسماء محمود الحداد، المهندسة المعمارية، والتى تعيش فى الغردقة، عن هوايتها الفنية، لـ" اليوم السابع"، حيث قالت :"أنا مؤمنة بأن لكل سن حلاوته الخاصة به و إننا لازم نستغل ده، عشان كده محبتش أدفن نفسي في المذاكرة و بس، ولكن فكرت أعمل حاجة مختلفة تضيف لمسات فنية في حياة أصحابى، وأنا أصلاً بحب الرسم من زمان أوي، حبيت استغل الرسم فى حاجة جديدة و تكون مفيدة فى نفس الوقت، زي تكون قطعة مميزة في الديكور أو قطعة مميزة يقدر حد يقدمها لشخص عزيز عليه، عشان تعيش معاه العمر كله".
تصميم أخر لأسماء
تابعت :"فكرت فى الرسم على جذوع الشجر، لأن أي قطعة من الطبيعة لما بتدخل فى ديكور البيت، بتضيف له حيوية و إحساس مختلف، ومن هنا بدأت أضيف لمستي الخاصة وبألوان فى الرسم على جذع الخشب".
تصميم أسماء محمود
رسمت أسماء بريشتها وألوانها أدعية دينية وتهنئة بمناسبة حلول شهر رمضان، وتصميمات أخرى مختلفة مثل كتابة بعض كلمات الأغانى الشهيرة، مع رسم شخصيات كرتونية أو مناظر طبيعية، والتى تحدثت عنها قائلة :" أغلب التصميمات بتكون نابعة من حكايات مش مجرد رسمة، يعنى بعرف سبب الهدية والأغنية والكرتون المفضل للمهدى له، وجملته المميزة، وبناء عليه برسم لوحة تليق على الشخصية".
تصميم أسماء
وأضافت :" أكتر تصميمات بتطلب منى، بتكون تهنئة بمناسبة زواج، وبيكون التصميم عبارة عن قطعة ديكور مميزة ".
تصميم أسماء محمود الحداد
تواجه أسماء بعض الصعوبات أثناء عملها، والذى تحدثت عنه قائلة :"المشاكل اللي بتقابلني كانت إني برسم علي نوع شجر معين وهو مش موجود كتير في مصر، والمشكلة التانية شركات الشحن مشاكلها نوعا ما مش لطيفة زى غلاء أسعارهم أو عدم اهتمامهم بالهدية فبالتالي بتتبهدل شوية ".
تصميم أسماء الحداد
أنهت أسماء حديثها معبرة عن أمنيتها قائلة :"أتمني أطور من شغلى و أدخل جذوع الشجر في حاجات و تصميمات و ديكورات جديدة".
تصميم لأغنية لأم كلثوم
تصميم لأغنية فاضى شوية
رسم على الخشب
تم أضافة تعليقك سوف يظهر بعد المراجعة